MANILA, Philippines – Ang mga miyembro ng House of Representatives na tinaguriang “cong-tractors” ng Independent Commission for Infrastructure (ICI) ay nagpahayag ng kanilang kahandaan na sumailalim sa imbestigasyon para sa posibleng conflict of interest dahil sa umano’y koneksyon nila sa mga construction company.
Ipinahayag nila ito kasunod ng rekomendasyon ng ICI para sa administratibo at kriminal na kaso laban sa kanila nitong Miyerkules, Nob. 26. Kabilang dito sina Surigao del Norte 1st district Rep. Francisco Matugas, Cagayan 3rd district Rep. Joseph Lara, at USWAG Ilonggo Party-list Rep. James Ang.
Ayon sa pahayag, si Matugas—na inuugnay ng ICI sa construction firm na Boometrix Development Corp.—ay “patuloy na nakatuon sa pagbibigay ng tapat, responsable, at walang pagod na serbisyo publiko para sa mga tao ng Surigao del Norte.”
Ang tugon ni Lara sa pamamagitan ng kanyang Facebook ay sumusunod sa parehong tema:
“Maluwag po naming tinatanggap ang naging desisyon ng [ICI] na iendorso sa Office of the Ombudsman ang kaso patungkol sa aking kaugnayan sa JLL Pulsar Construction.”
“Magsisilbi po itong pagkakataon para sa atin na harapin ang lahat ng mga paratang at patunayan sa ‘proper forum’ na wala po tayong nilalabag na batas,” ayon kay Lara.
Binigyang-diin ng solon na ang referral ng kaso ng ICI sa Office of the Ombudsman ay hindi tungkol sa mga anomalya sa flood ghost projects o substandard projects, kundi tanging sa kanyang umano’y kaugnayan sa JLL Pulsar Construction.
“Muli po, nais po nating ipabatid na bago pa man tayo sumabak sa serbisyo publiko ay wala na tayong anumang kaugnayan sa JLL Pulsar Construction at higit sa lahat, kahit kailan ay hindi po sumali ang JLL Pulsar Construction sa mga kontrata ng mga proyekto sa Tersera Distrito ng Cagavan mula po nung tayo ay naluklok bilang kinatawan ng Tersera Distrito,” dagdag niya.
Para naman kay Ang, sinabi niyang “ang kanyang konsensya ay malinis.” Inuugnay siya ng ICI sa IBC International Builders Corporation at Allencon Development Corporation.
“I am confident that I will be able to clear my name soon. My resolve for the truth to come out is stronger and clearer,” aniya.
“In my three years in public service, I have never used my position in the government for my own interest and to profit in any way. I stand firm on what is true and just. I am ready to face this case in the proper forum,” saad ni Ang.
Kasama sa listahan ng ICI ng mga cong-tractors sina dating Ako Bicol Party-list representative Zaldy Co (FS Co. Builders Supply), Construction Workers Solidarity (CWS) Party-list Rep. Edwin Gardiola (Newington Builders, Inc., Lourel Development Corporation, at S-Ang General Construction & Trading Inc.), PUSONG PINOY Party-list Rep. Jernie Nisay (JVN Construction and Trading), Bulacan 2nd district Rep. Agustina Pancho (C.M. Pancho Construction Inc.), at Tarlac 3rd district Rep. Noel Rivera (Tarlac 3-G Construction & Development Corporation). RNT/MND
