MANILA, Philippines – Kinumpirma ng Philippine Space Agency (PhilSA) nitong Sabado, Disyembre 6 ang paglulunsad ng “Long March 8A rocket” mula sa China.
Inaasahang babagsak ang debris mula rito sa identified drop zones sa layong 120 nautical miles mula sa El Nido, Palawan at 140 NM mula sa Puerto Princesa, Palawan; 48 NM mula sa Tubbataha Reefs Natural Park, 31 NM mula sa Hadji Muhtamad, Basilan, at 40 NM mula sa Pangutaran Island, Sulu.
Ayon sa PhilSA, ang Long March 8A rocket ay inilunsad mula sa Hainan International Commercial Launch Center sa Wenchang, Hainan, 3:52 ng hapon nitong Sabado.
Ang mga detalye sa rocket drop zones ay inilabas sa pamamagitan ng Notice to Airmen (NOTAM) warning ng “aerospace flight activity.”
“While not projected to fall on land features or inhabited areas, falling debris poses danger and potential risk to ships, aircraft, fishing boats, and other vessels that will pass through the drop zone,” sinabi ng PhilSA.
Idinagdag pa na may posibilidad na lumutang ang debris sa dagat at mapadpad sa mga baybayin.
“The possibility of an uncontrolled re-entry to the atmosphere of the rocket’s upper stages returning from outer space cannot be ruled out at this time,” ayon sa PhilSA.
Inabisuhan ng PhilSA ang publiko na sabihan ang mga awtoridad kung may makitang posibleng rocket debris.
Ibinabala rin ang pagkuha o paglapit sa mga ito na maaaring naglalaman ng remnants ng toxic substances katulad ng rocket fuel. RNT/JGC
