MANILA, Philippines – Inendorso ng 15 chief prosecutors sa Metro Manila si Supreme Court Associate Justice Rodil V. Zalameda bilang susunod na Chief Justice dahil sa kanyang kahusayan sa batas, pamumuno at malinis na rekord sa serbisyo publiko.
Sa Resolution No. 03, Series of 2026, sinabi ng NCR Chief Prosecutors Association Inc. na si Zalameda ang pinakakuwalipikadong humalili kay Chief Justice Alexander G. Gesmundo, na nakatakdang magretiro sa Nobyembre 6.
“RESOLVED, that the Association shall give its full support and solely endorse Supreme Court Associate Justice Rodil V. Zalameda as Supreme Court Chief Justice vice Hon. Alexander G. Gesmundo,” ayon sa resolusyon.
Lumagda rito sina Chief Prosecutors Ma. Aileen D. Guño ng Caloocan, Marylin Cynthia Fatima Madamba-Luang ng Las Piñas, Dindo G. Venturanza ng Makati, Rennet D. Evangelista ng Malabon at Elinore Concepcion R. Aquino-Laluces ng Mandaluyong.
Kabilang din sina Chief Prosecutors Giovanne T. Lim ng Manila, Laurence Joel M. Taliping ng Marikina, Aileen Marie S. Gutierrez ng Muntinlupa, Armando H. Cavalida ng Navotas at Benjamin S. Vermug Jr. ng Parañaque.
Lumagda rin sina Chief Prosecutors Elmer Cris L. Rillo ng Pasay, Rey Camilo B. Dumlao II ng Pasig, Vimar M. Barcellano ng Quezon City, Vincent M. Villena ng Taguig at Lemuel B. Nobleza ng Valenzuela.
Nagsimula si Zalameda bilang prosecutor sa Mandaluyong noong 1995 at naging city prosecutor noong 2002. Nagsilbi rin siya bilang mahistrado ng Court of Appeals sa loob ng 11 taon bago italaga sa Korte Suprema noong 2019.
Siya ang kauna-unahang dating city prosecutor na naging mahistrado ng Korte Suprema.
“Supreme Court Associate Justice Rodil V. Zalameda’s years of law practice attests to his unyielding pursuit of justice, effective leadership skills and administrative acumen,” ayon sa asosasyon.
Binigyang-diin ng grupo na taglay ni Zalameda ang karanasan, mahusay na pamumuno at malinis na rekord na kailangan upang pamunuan ang hudikatura at mapanatili ang tiwala ng publiko.
Nagkakaisang inaprubahan ang resolusyon noong Setyembre 2 sa Muntinlupa City at pinagtibay ni Guño bilang corporate secretary ng asosasyon.
