MANILA, Philippines – Kukunin ng proposed Independent People’s Commission (IPC) ang trabahong pag-iimbestiga sa mga anomalya mula sa Independent Commission for Infrastructure (ICI) kung mabubuwag ito, ayon kay Senate President Vicente “Tito” Sotto III.
Ang pahayag ni Sotto ay kasunod ng sinabi ni Ombudsman Jesus Crispin “Boying” Remulla na naniniwala siyang ang ICI ay mayroon lamang isa o dalawang buwan bago iturn-over ng investigating body ang trabaho sa kanyang opisina.
Ayon kay Sotto, ang IPC, na inihain niya noong Agosto, ay ipagpapatuloy ang trabaho ng ICI at sinabing ang panukalang batas ay maaaring maipasa “in one or two months” lalo’t ito ay nasa ikalawang pagbasa na.
Sinabi pa ng Senate President na ang IPC ay mayroong prosecutorial powers, kabilang ang kapangyarihan na mag-isyu ng mga subpoena at ipa-contempt ang mga indibidwal.
Aniya, hindi katulad sa ICI na ang mandato ay mag-imbestiga lamang sa mga infrastructure project, ang kanyang bersyon ng IPC ay mag-iimbestiga sa anumang uri ng anomalya sa bansa.
“All the anomalies, the corruption, the anomalies in the NIA (National Irrigation Administration), in agriculture—all of that will be prosecuted. The IPC can investigate all of that,” pahayag ni Sotto.
“I would like to add that aside from the five, maybe we can make it seven so that one representative is from the DOJ (Department of Justice) and one representative is from the Ombudsman so that it can be done directly. Isn’t it good that after the investigation, the Ombudsman will no longer investigate? Because there already is one,” ipinunto pa nito.
Ani Sotto, ang kwalipikasyon para maging pinuno ng IPC ay dapat na dating chief justice, katulad ng sa ICI na ngayon ay pinamumunuan ni dating Supreme Court Justice Andres Reyes Jr.
Ang ICI ay nilikha sa pamamagitan ng Executive Order No. 94 ni Pangulong Ferdinand Marcos Jr. noong Setyembre.
Limitado lamang ang kapangyarihan ng komisyon sa pagsasagawa ng pagdinig, pagkuha ng testimonya, at pagtanggap, pangangalap, at pagsusuri ng mga report, ebidensya at impormasyon bago irekomenda ang paghahain ng reklamo sa Office of the Ombudsman.
Ani ICI Executive Director Brian Hosaka, ipagpapatuloy ng ICI ang mandato nito hanggang sa ito ay “dissolved by the President (as) stated in the executive order that created the ICI.”
Matapos ang unang tatlong buwan ng operasyon na walang budget, inilabas na ng Department of Budget and Management (DBM) ang P41 milyong badyet ng komisyon nitong Biyernes. RNT/JGC
