MANILA, Philippines – Nakapagtala ang Quezon City government ng 648 bagong kaso at apat na pagkamatay na may kaugnayan sa dengue mula Nobyembre 17 hanggang Disyembre 4.
Sa pangkalahatang ulat, may kabuuang 10,609 kaso ang naiulat sa lungsod mula Enero 1 hanggang Disyembre 4—pagtaas ng 1,880 kaso mula noong Oktubre 7.
Ayon sa isang post sa social media nitong Martes, hinimok ng pamahalaang lungsod ang mga residente na agad na magpakonsulta sa unang senyales ng dengue, tulad ng lagnat, sakit ng ulo at pantal, upang maiwasan ang malubhang komplikasyon at mabawasan ang panganib ng pagkamatay.
“Ang mga bilang ng kaso ay nanatili sa itaas ng epidemic threshold mula Morbidity Weeks 40 hanggang 47 (Set. 28 hanggang Nob. 16), maliban sa Linggo 46,” ayon sa surveillance report ng QC Epidemiology and Surveillance Division (QCESD).
Sa apat na naitalang pagkamatay, tatlo ay lalaki at isa ay babae, na may edad 5 hanggang 21 taon. Tatlo ang nagpakita ng mga warning signs sa oras ng pag-uulat, habang ang isang kaso ay inuri bilang severe.
Sa kabuuang 648 bagong kaso, 57% (368) ay lalaki at 43% (280) ay babae. Samantala, 324 kaso o kalahati ng mga pasyente ay mga batang may edad 5 hanggang 17.
Ayon pa sa ulat, 326 kaso (59%) ang nauri bilang dengue na may warning signs, 305 kaso (47%) bilang dengue na walang warning signs, at 12 kaso (2%) bilang severe dengue.
Nagtala ng pinakamaraming kaso ang Barangay Payatas, na sinundan ng Batasan Hills at Commonwealth.
Ang mga ospital na may pinakamaraming naitalang kaso ay ang Rosario Maclang Bautista General Hospital, National Children’s Hospital, at Quezon City General Hospital.
Makikita ang listahan ng mga health center sa website ng Quezon City government. (Santi Celario)
