MANILA, Philippines – Mahigpit na pinabulaanan ni Senate President Pro Tempore Panfilo “Ping” M. Lacson nitong Miyerkules ang mga alegasyon sa ₱17.9-bilyong “Senate pork barrel fund” sa panukalang badyet sa 2026.
Sa pahayag, sinabi ni Lacson na inilaan ang naturang pondo para dagdagan ang subsistence allowance ng uniformed personnel, taliwas sa paratang ni ACT Rep. Antonio Tinio na itinuturing itong “Senate pork” na pawang trabahong tamad o may malisya.
“The ‘Senate pork’ referred to by Rep. Tinio are actually realignments to increase the subsistence allowance of the uniformed personnel from the Philippine National Police, Bureau of Jail Management and Penology, and Bureau of Fire Protection, and also the Philippine Coast Guard,” giit ni Lacson.
“Rep. Tinio is either too lazy to do his research, or he is malevolently destabilizing the Senate to take the heat off the House of Representatives,” dagdag niya.
Noong Linggo, iginiit ni Lacson na hindi niya pipirmahan para ratipikahin ang bicam report sa 2026 budget bill hangga’t hindi naitutuwid ang mga probisyon na nagbibigay ng malaking pondo sa Medical Assistance to Indigent and Financially Incapacitated Patients (MAIFIP) at sa maaaring maanomalyang farm-to-market roads. Hiniling ng House contingent na palakihin ang badyet ng MAIFIP sa P51 billion.
Paratang naman ni Tinio noong Martes na may umano’y ₱17.9-bilyong “LGU pork” sa bersyon ng Senado ng 2026 General Appropriations Bill (GAB).
Ani Tinio, may malalaking kaltas umano ang bersyon ng Senado sa mga benepisyo ng mga rank-and-file na kawani ng gobyerno, na inilipat umano sa “discretionary pork barrel funds for Local Government Units (LGUs).”
“Gusto kong i-clarify, mali ang sinasabi niya. Ang line na kinuha sa MPBF o Miscellaneous Personnel Benefits Fund, realign talaga yan pero sa additional subsistence allowance ng uniformed personnel,” tugon ni Lacson sa panayam sa DZBB.
Dagdag ni Lacson, ito ay isang institutional amendment kung saan hindi makikinabang ang proponent nito.
Inulit ni Lacson ang panawagan sa media at sa publiko na manatiling mapagmatyag upang maiwasan ang mga manipulasyon sa panukalang badyet—lalo na ngayong naka-livestream ang mga pagdinig ng bicameral conference committee.
Aniya, dapat panatilihin ang pressure sa mga mambabatas upang hindi ipilit ang pagpopondo sa mga kuwestiyunableng programa, partikular yaong may kinalaman sa political patronage.
“All our (Senate) amendments are institutional and openly proposed on the Senate floor during the period of individual amendments,” aniya.
“Everything was transcribed and is now part of the Senate records for all future generations of senators to see,” dagdag niya. (Ernie Reyes)
