NORTHERN SAMAR, Philippines – Dalawang miyembro ng New People’s Army (NPA) ang napatay habang tatlong high-powered firearms ang nasamsam matapos ang engkuwentro sa mga tropa ng gobyerno sa Barangay Bulao, Las Navas, Northern Samar noong Biyernes, December 19, ayon sa 8th Infantry Division ng Philippine Army.
Ayon sa militar, sinalubong ng 20th Infantry Brigade ang mga NPA matapos makatanggap ng ulat mula sa mga magsasaka tungkol sa presensya ng armado sa lugar. Sinasabing nananakot at nangongolekta ng pera at bahagi ng ani ang mga NPA, kaya humingi ng tulong ang mga residente sa awtoridad.
Walang nasabing nasaktan sa panig ng gobyerno. Patuloy na naka-alerto ang mga puwersa sa lugar upang pigilan ang muling pagbuo ng NPA at tiyakin ang kaligtasan ng mga komunidad, lalo na sa mga malalayong baryo. Ayon sa militar, isa ang Northern Samar sa mga natitirang lugar sa Eastern Visayas na aktibo ang NPA, na kadalasang target ang rural communities sa pamamagitan ng pananakot at pangongolekta. RNT/MND
