MANILA, Philippines – Binatikos ni Mindanao Development Authority (MinDA) Chairman Secretary Leo Magno ang mga ulat na muling tinutukoy ang Mindanao bilang “terrorism hotspot” matapos ang balita na ang mag‑ama sa likod ng Bondi Beach shooting sa Sydney, Australia ay pansamantalang nag-stay dito noong Nobyembre. Aniya, “misleading at unfair” ang ganitong mga pahayag.
Ipinaliwanag ni Magno na hindi dapat husgahan ang Mindanao batay sa kakaibang paggalaw ng ilang banyagang bisita, lalo na’t ang kanilang motibo ay patuloy pang iniimbestigahan. Ayon sa ulat, ang mag‑ama, Sajid at Naveed Akram, ay naglakbay mula Sydney patungong Manila at Davao mula Nobyembre 1 hanggang 28, 2025, at nanatili sa isang budget hotel sa downtown area. Sinasabing madalang silang lumabas at bihira makihalubilo sa staff ng hotel.
Iginiit ni Magno na ang Mindanao ay ligtas at maunlad, at wala pang ebidensiya na may operasyon, radikalisasyon, o planong terorismo na naganap doon. Binanggit niya na milyon-milyong turista, negosyante, at OFW ang dumadaan sa Mindanao taon-taon para sa lehitimong dahilan. Sinabi rin ni National Security Adviser Eduardo Año na walang intelligence report na nagpapatunay na tumanggap ng military o terrorist training ang mag‑ama habang nasa Pilipinas, at ang kanilang 27-araw na pananatili sa hotel ay hindi sapat para sa ganitong aktibidad.
Ayon kay Año, ang mga ulat na inilalarawan ang Mindanao bilang sentro ng ekstremismo o ISIS ideology ay lipas at nakaliligaw. “Mula noong 2017 Marawi Siege, malaki ang napagbuti ng seguridad sa Mindanao at nawasak na ang mga ISIS-affiliated groups sa bansa,” dagdag niya. RNT/MND
