Sekyu na suspek sa pamamaril ng dalawang kabaro sa bisperas ng Pasko, arestado ng QCPD

MANILA, Philippines -Inihayag ng Quezon City Police District (QCPD) Acting Director, PCOL RANDY GLENN SILVIO, ang matagumpay na pag-aresto sa isang suspek na sangkot sa isang insidente ng pamamaril na nagresulta sa pagkamatay ng dalawang security guard sa loob ng isang car dealership na matatagpuan sa Commonwealth Ave., Brgy. North Fairview, Quezon City.

Kinilala ni PLTCOL ROLDANTE SARMIENTO, Station Commander ng Fairview Police Station (PS 5), ang suspek bilang si alyas “Charren”, 24 taong gulang at residente ng Brgy. 20, Cagayan De Oro City.

Ayon sa ulat, bandang 12:50 ng hapon noong Disyembre 24, 2025, ang mga biktima at ang suspek ay nag-iinuman sa service area ng nasabing establisyimento nang biglang lumapit ang suspek sa isang sales executive at nagsalita sa lokal na diyalekto na nagpapahayag ng kanyang balak na pumatay ng isang tao.

Doon, nakita ng saksi ang suspek na tumungo sa service lounge area at nakarinig ng dalawang magkasunod na putok ng baril.

Sumugod ang saksi sa lugar at nakita ang walang buhay na katawan ng mga biktima sa isang sofa, habang ang suspek ay tumakas palabas ng pinangyarihan at sumakay ng taxi. Kasunod nito, agad na iniulat ang insidente sa PS 5.

Bilang tugon sa insidente, isang hot pursuit operation ang isinagawa ng mga pinagsanib na tauhan ng QCPD sa pakikipagtulungan ng Manila Police District (MPD) na nagresulta sa pagkaaresto sa suspek noong 9:15 AM ngayon, Disyembre 25, 2025 sa Ram compound Mayhaligue Street, malapit sa kanto ng Rivera Street, Barangay 241 Tondo Manila, wala pang 24 oras matapos ang insidente.

Ang mga narekober na ebidensya ay isang (1) unit ng caliber 9mm Rock Island pistol, isang (1) magazine, anim (6) na fired cartridge cases, dalawang (2) fired bala, isang (1) live cartridge, mga bote ng alak, dalawang cellular phone na pagmamay-ari ng mga biktima, isang (1) pang-itaas na uniporme, isang security ID, at bagpack na naglalaman ng isang unit ng infinix at ilang damit ng suspek.

Sa mabilisang pagsusuri, natuklasan na ang biktimang si SG MARK JOHN ay nagtamo ng tama ng bala sa ulo, habang ang biktimang si SG RENATO ay nagtamo ng tama ng bala sa lalamunan. Ang mga bangkay ay dinala sa Kalli Funeral Service para sa wastong disposisyon.

Ang suspek ay sasampahan ng dalawang bilang ng Murder at Robbery sa Tanggapan ng Taga-usig ng Lungsod Quezon.

Pinuri ni PCOL SILVIO ang mga operatiba para sa kanilang mabilis na aksyon at pagtutulungan na humantong sa mabilis na pag-aresto sa suspek.

“Ang matagumpay na operasyong ito ay nagpapakita na kahit na sa panahon ng kapaskuhan, ang QCPD ay nananatiling matatag sa pangako nitong tiyakin ang hustisya para sa mga biktima at mapanatili ang kapayapaan at kaayusan sa Lungsod Quezon.” aniya. VAL LEONARDO