MANILA, Philippines – Ayon sa PAGASA nitong Huwebes, tatlong weather systems ang magdudulot ng maulap na kalangitan at pag-ulan sa ilang bahagi ng bansa sa unang araw ng 2026.
Sa 4 a.m. advisory ng PAGASA, sinabi na ang shear line ang magdadala ng maulap na panahon na may kalat-kalat na pag-ulan at mga thunderstorm sa Mimaropa, Bicol Region, Western Visayas, at Quezon.
Posible ang pagbaha at pagguho ng lupa dahil sa katamtaman hanggang malakas na ulan.
Samantala, bahagyang maulap hanggang maulap na kalangitan na may panaka-nakang pag-ulan o thunderstorm ang mararanasan sa Mindanao at nalalabing bahagi ng Visayas dahil sa easterlies.
Nagbabala rin ang PAGASA sa posibleng flash floods o landslides tuwing may malalakas na thunderstorm.
Ang amihan naman ang magdadala ng bahagyang maulap hanggang maulap na kalangitan na may panaka-nakang mahinang ulan sa Metro Manila at iba pang bahagi ng Luzon, ngunit wala umanong inaasahang malaking epekto.
Makakaranas ng malalakas hanggang mala-bagyong hangin mula hilagang-silangan hanggang hilaga ang Extreme Northern Luzon, na magdudulot ng maalon hanggang napakaalon na dagat na maaaring umabot sa 4.5 metro.
Katamtaman hanggang malalakas na hangin naman ang mararanasan sa natitirang bahagi ng Northern Luzon, habang banayad hanggang katamtamang hangin at banayad hanggang katamtamang alon ang inaasahan sa ibang bahagi ng bansa. RNT/MND
