MANILA, Philippines — Ilang deboto ang dinala sa mga ospital sa gitna ng nagpapatuloy na Traslacion 2026 sa Maynila noong Biyernes ng madaling araw, ayon sa Philippine Red Cross (PRC).
Ayon sa ulat ng PRC hanggang alas-6 ng umaga, dalawang pasyente ang dinala sa Philippine General Hospital at isa sa East Avenue Medical Center.
Dalawa pang pasyente mula sa PRC Emergency Field Hospital ang inilipat sa iba pang ospital para sa mas advanced na pangangalaga.
Umabot sa humigit-kumulang 100 pasyente ang natulungan ng PRC.
Karamihan sa mga kaso ay para sa vital signs monitoring, na umabot sa 58 indibidwal, habang 34 ang ginamot para sa mga minor na kondisyon tulad ng pagkahilo, gasgas, maliliit na sugat, at pilay. Limang pasyente ang nagtamo ng malalaking pinsala, kabilang ang malalalim na hiwa.
Ang PRC Emergency Field Hospital sa KKK Monument ay naglingkod sa 15 pasyente, karamihan para sa minor na kaso. Sampung pasyente ang patuloy na minomonitor, at apat ang nakalabas na.
Bukod sa serbisyong medikal, nagbigay din ang PRC ng welfare assistance sa 16 indibidwal, kabilang ang psychosocial support, referrals, at tulong sa komunikasyon.
Para sa Traslacion, nag-deploy ang PRC ng 17 first aid stations, 19 ambulansya, at siyam na Medic on Wheels units, at halos 1,200 na staff at volunteers ang nakatuon sa pagtugon sa mga emerhensiya. RNT
