MANILA, Philippines – Matapos ang pagkamatay ng isang sibilyan at tatlong pulis, kabilang ang hepe ng pulisya, sa Sibulan, Negros Oriental noong Biyernes ng gabi, pinaalalahanan ng Philippine National Police (PNP) ang lahat ng kanilang tauhan na umayos sa kilos at magsilbing huwaran sa kani-kanilang mga destinasyon.
Ayon kay Acting PNP chief Lt. Gen. Jose Melencio C. Nartatez, Jr., dapat laging tandaan ng bawat pulis ang disiplina, propesyonalismo, at etikal na pag-uugali bilang pundasyon ng serbisyo-pulisya.
“The PNP maintains a policy of zero tolerance for any immoral, illegal, or unethical act that tarnishes the image of the service or undermines public confidence. All PNP personnel are reminded that they are expected to remain physically, emotionally, and psychologically fit to perform their duties at all times,” ani Nartatez.
Dagdag pa niya, “Any behavior that impairs judgment, weakens control, or poses risk to others is unacceptable. Police authority, particularly the handling of firearms and enforcement powers, must always be exercised with restraint, vigilance, and full accountability.”
Sinabi ni Nartatez na nadismaya siya sa ulat na ang suspek, isang police sergeant na nakatalaga sa Sibulan Municipal Police Station, ay nakitang nasa isang resto bar bago umano niya binaril at napatay ang isang babae sa loob nito.
Ang parehong pulis, na kinilalang si Police Staff Sergeant Bonifacio Saycon, Jr., ay binaril at napatay rin ang hepe ng pulisya ng Sibulan at dalawa pang pulis na rumesponde at umaresto sa kanya.
Inatasan ni Nartatez ang mga unit commander at pinuno ng mga tanggapan na magpatupad ng mahigpit na pagbabantay, disiplinang mahigpit, at agarang aksyon laban sa anumang maling asal.
“The PNP emphasizes that wearing the uniform is a privilege that carries immense responsibility. Discipline, accountability, and integrity are non-negotiable in ensuring that the organization remains worthy of the trust and confidence of the Filipino people,’ dagdag ni Nartatez. RNT/MND
