MANILA, Philippines – Sumiklab ang sunog sa tanggapan ng Department of Public Works and Highways (DPWH) sa Cordillera Administrative Region sa Baguio City noong Miyerkules ng hapon.
Base sa impormasyon, nagsimula umano ang sunog sa financial management records room ng ahensya. Sinubukan pa umano itong apulahin ng isang utility worker at ilan pang nakakita gamit ang 10-lb fire extinguishers hanggang sa nakarating ang Baguio City Fire Station (BCFS).
Iniulat ng Baguio City Fire Station ang sunog bandang alas-5 ng hapon, at naideklara itong kontrolado ng alas-5:43 p.m.
“Initial assessment by the Bureau of Fire Protection (BFP) indicates that the affected area was limited to approximately two square meters of the office. No DPWH employee was injured in the said incident,” ayon sa pahayag ng DPWH.
Ayon pa sa DPWH, nakikipag-ugnayan ito sa BFP at sa lokal na pamahalaan ng Baguio City para imbestigahan ang insidente. Dave Baluyot
