MANILA, Philippines – Maglalabas ang Department of Health (DOH) ng bagong guidelines para sa Medical Assistance for Indigent and Financially Incapacitated Patients (MAIFIP) bago matapos ang Pebrero, kasunod ng mas mahigpit na patakaran na nagbabawal sa paggamit ng guarantee letters mula sa mga halal na opisyal sa pagbabayad ng hospital bills.
Sa panayam sa radyo noong Sabado, sinabi ni DOH spokesperson Assistant Secretary Albert Domingo na ang updated guidelines ay nakaangkla sa direktiba ni Pangulong Ferdinand Marcos Jr., na isinabatas sa ilalim ng Section 19 ng 2026 General Appropriations Act (GAA).
Ayon sa DOH, palalawakin ng bagong MAIFIP framework ang saklaw ng benepisyo upang isama ang ambulatory care, ambulatory surgical clinics, eye centers, ophthalmology at dental services, free-standing dialysis clinics, at FDA-approved medicines.
Isa sa pinakamahalagang pagbabago ang 100% coverage ng professional fees ng mga doktor, alinsunod sa DOH guidelines at matapos ang konsultasyon sa mga kinikilalang medical societies.
Sinabi rin ni Domingo na sinusuportahan ang pinalawak na benepisyo ng mas mataas na pondo para sa MAIFIP—mula P41.16 bilyon noong 2025 ay tumaas ito sa P51.65 bilyon ngayong 2026, na magsisilbing batayan ng mga ilalabas na patakaran.
Ang Section 19 ng 2026 GAA, na nilagdaan noong Enero 5, ay tahasang nagbabawal sa mga public officials, kandidato, at kanilang mga kinatawan na makialam sa pamamahagi ng financial assistance, maliban sa mga may direktang administrative at executive authority sa ahensiyang nagpapatupad.
Noong nakaraang taon, nagpahayag si Caloocan Cardinal Pablo Virgilio “Ambo” David ng mga alalahaning moral at konstitusyonal sa pagpapalawak ng MAIFIP, binabalaang maaari itong magpatibay ng political patronage at makapagpahina sa dignidad ng tao. RNT/MND
