MANILA, Philippines – Ipinagpatuloy na ang Senate Blue Ribbon Committee sa pag-iimbestiga sa umano’y anomalya sa mga flood control projects ng gobyerno ngayong Lunes, Enero 19.
Kabilang sa mga dumalo sa ikawalong public hearing si Batangas 1st District Representative Leandro Legarda Leviste, na nagsabing hawak niya ang “Cabral files” — mga dokumentong inilabas noong huling bahagi ng 2025 ng yumaong undersecretary ng Department of Public Works and Highways (DPWH) na si Maria Catalina Cabral.
Ayon sa mga dokumento, naglalaman ito ng listahan ng mga proyekto at pondo na itinalaga sa iba’t ibang legislative districts mula 2023 hanggang 2026.
Dumalo rin ang dating DPWH Secretary Manuel Bonoan, na iniuulat na pinaikli ang kanyang paglalakbay sa Estados Unidos upang tumugon sa subpoena ng panel.
Sinabi ni Senate President Pro Tempore Panfilo “Ping” Lacson, chairman ng Blue Ribbon panel, na nag-submit si Bonoan ng maling grid coordinates para sa libu-libong flood control projects sa Malacañang, at isinama ang mga ito sa Sumbong sa Pangulo website.
Naglabas din ang panel ng show cause order laban kay dating Sgt. Orly Guteza at dating representative Zaldy Co dahil sa paulit-ulit na pagliban sa mga pagdinig. RNT
