MANILA, Philippines – Makararanas ng maulap na kalangitan na may mahihinang pag-ulan sa malaking bahagi ng Luzon ngayong Miyerkules dahil sa Northeast Monsoon o Amihan, ayon sa Philippine Atmospheric, Geophysical and Astronomical Services Administration (PAGASA).
Ayon sa PAGASA, makakaranas ng maulap na kalangitan na may mahihinang pag-ulan ang Cordillera Administrative Region, Cagayan Valley, Bicol Region, Aurora, at Quezon. Bahagyang maulap hanggang maulap na may panaka-nakang mahinang ulan naman ang mararanasan sa Metro Manila, Ilocos Region, natitirang bahagi ng Central Luzon at CALABARZON, Oriental at Occidental Mindoro, Marinduque, at Romblon. Sinabi ng ahensya na wala itong inaasahang malaking epekto.
Patuloy ding minomonitor ng PAGASA ang Tropical Depression Ada (international name: Nokaen), na noong madaling araw ng Miyerkules ay tinatayang nasa humigit-kumulang 1,215 kilometro sa silangan ng Northern Luzon.
Taglay nito ang lakas ng hangin na 55 kilometro kada oras malapit sa sentro at bugso na hanggang 70 km/h, at kumikilos pahilagang-silangan sa bilis na 20 km/h. Wala namang nakataas na Tropical Cyclone Wind Signal.
Samantala, sinabi ng PAGASA na unti-unti nang lumalayo sa Luzon ang bagyong Ada at inaasahang magpapatuloy ang paggalaw nito pa-timog-silangan sa loob ng susunod na 24 oras.
Dahil sa dry air na dulot ng Amihan, inaasahang hihina ang Ada at magiging low pressure area pagsapit ng Miyerkules o madaling araw ng Huwebes.
Magdudulot din ang Amihan ng malalakas hanggang gale-force na hangin sa karamihan ng Luzon, Visayas, Caraga, Davao Region, Zamboanga Peninsula, at ilang bahagi ng Northern Mindanao.
Nananatili ang gale warning sa silangang baybayin ng Luzon at sa hilaga at kanlurang baybayin ng Northern Luzon, kung saan inaasahan ang magaspang hanggang napaka-magaspang na karagatan. Pinayuhan ang mga mangingisda at seafarers na mag-ingat o iwasan muna ang paglalayag.
Sa iba pang bahagi ng bansa, inaasahan ang bahagyang maulap hanggang maulap na kalangitan na may panaka-nakang pag-ulan o thunderstorms dahil sa localized thunderstorms, na maaaring magdulot ng pagbaha o pagguho ng lupa sa matitinding pag-ulan. RNT
