MANILA, Philippines – Itinuturing na “fit to take part” si dating pangulong Rodrigo Duterte sa pre-trial proceedings ng International Criminal Court (ICC) kaugnay ng kanyang kaso sa crimes against humanity, ayon sa anunsyo ng Pre-Trial Chamber I.
Sinabi ng ICC na magsisimula nang pormal ang confirmation hearing ni Duterte sa Feb. 23. Dati nang humiling ang kampo ni Duterte ng indefinite adjournment ng mga pagdinig, kabilang ang confirmation hearing, at iginiit na hindi siya angkop lumahok.
Nagtalaga ang chamber ng panel ng tatlong medical experts para magsagawa ng medikal na pagsusuri, at nagsumite si Duterte ng assessment report noong Disyembre.
“Having regard to the relevant legal principles, the medical assessment of the independent experts composing the Panel, and all of the relevant circumstances of the case, the Chamber was satisfied that Mr. Duterte is able effectively to exercise his procedural rights and is therefore fit to take part in the pre-trial proceedings, which are thereby resumed,” ani Pre-Trial Chamber I.
Ayon sa ICC, maglalabas ito ng kautusan sa lalong madaling panahon upang magbigay ng direksyon para mapadali ang partisipasyon ni Duterte sa pagdinig.
Ang confirmation hearing, na orihinal na itinakda noong Setyembre 2025, ay tutukuyin kung sapat ang ebidensiya upang paniwalaang nagkasala si Duterte, na magdiriwang ng ika-81 kaarawan sa Marso.
“If one or more of the charges are confirmed, the case will be transferred to a Trial Chamber, which will conduct the subsequent phase of the proceedings: the trial,” dagdag ng ICC.
Pinaghihinalaan si Duterte ng crimes against humanity na murder at attempted murder, na diumano’y ginawa sa Pilipinas mula Nobyembre 2011 hanggang Marso 2019 bilang bahagi ng kampanya kontra droga. Inaresto si Duterte noong Marso 11, 2025, at dinala sa kustodiya ng ICC sa The Hague noong Marso 12. RNT
