MANILA, Philippines – Nangako ang Maritime Industry Authority (MARINA) noong Miyerkules na paiigtingin ang regulasyon at pagpapatupad ng kaligtasan sa dagat kasunod ng mga kamakailang insidente, kabilang ang paglubog ng MV Trisha Kerstin 3 sa Basilan.
Ayon kay MARINA Enforcement Service Director Lui Delos Santos, ipinapakita ng mga aksidente ang malalalim na suliranin sa kaligtasan, kabilang ang kondisyon ng barko, maintenance, disiplina sa operasyon, at safety management systems.
“These are clear signals that existing controls and routine oversight are no longer sufficient,” ani Delos Santos.
Magpapatupad ang MARINA ng proactive at risk-based approach, kabilang ang mas masusing safety audits, target inspections sa high-risk vessels, at mahigpit na pananagutan para sa mga shipowner.
“Our objective is to prevent avoidable tragedies, protect lives at sea, and restore public confidence by ensuring that safety is never treated as optional in domestic shipping,” dagdag niya.
Magkakaroon ng nationwide safety audit sa domestic vessels, gamit ang scoring at classification system para ituon ang pagmamanman sa high-risk operators. Kasalukuyang pinangangasiwaan ng MARINA ang humigit-kumulang 16,000 barko, kabilang ang fishing, cargo, at passenger ships.
Binanggit ni Delos Santos na ang Aleson Shipping Lines, may-ari ng MV Trisha Kerstin 3, ay sangkot na sa 31 maritime incidents mula 2019. Marami sa kakulangan ang “rectifiable,” ngunit ang non-compliant vessels ay sinuspinde. Binigyang-diin niya ang responsibilidad ng mga shipowner sa maintenance at technical management.
Natukoy ng MARINA ang tatlong pangunahing risk areas: machinery failure, navigational control problems, at crew safety issues. Nagpadala na ng inspectors at auditors, kabilang ang naval architects at engineers, sa Zamboanga upang i-audit ang fleet ng Aleson. Maaaring makapag-operate muli ang barko kapag pumasa sa inspeksyon.
Apektado ang dalawang pangunahing ruta: Bongao, Tawi-Tawi–Zamboanga City, at Zamboanga City–Lamitan, Basilan. Nakiusap ang MARINA sa ibang operators na mag-deploy ng barko at pansamantalang gagamitin ang assets ng Philippine Coast Guard sa ilalim ng “Libreng Sakay” program. Walang aprubadong pagtaas sa pamasahe.
Pinadali rin ang insurance claims para sa mga biktima at nakaligtas, na may help desk sa opisina ng Aleson. Ang survivors ay makakatanggap ng P50,000, at ang pamilya ng mga namatay ay P200,000 bawat isa.
Umabot na sa 51 ang kabuuang nasawi mula sa Aleson-related incidents, kabilang ang 33 sa sunog noong 2023 at 18 mula sa paglubog ng MV Trisha Kerstin 3. Tiniyak ni Delos Santos sa publiko na karaniwang ligtas pa rin ang passenger vessels.
“[The public] should not be afraid. That’s what MARINA is assuring to our passengers using our maritime transportation system,” ani Delos Santos. RNT
