MANILA, Philippines – Ipinahayag ng isang grupo ng digital advocates ang kanilang pananaw na ang mga pagkaantala at hindi natuloy na renewable energy projects ng Solar Philippines ay maaaring nakaapekto sa kakayahan ng Pilipinas na makaposisyon bilang isang regional data center hub.
Ayon kay Ronald Gustilo, national campaigner ng Digital Pinoys, may mga power projects ang Solar Philippines na umano’y hindi agad naipatupad, kabilang ang mga proyektong may kabuuang inaasahang kapasidad na humigit-kumulang 12 gigawatts, batay sa mga commitment na iniulat sa Department of Energy (DOE).
Sinabi ni Gustilo na ang mga pagkaantala sa ilang proyekto ay maaaring nagdulot ng hindi natupad na oportunidad sa pamumuhunan, lalo na sa sektor ng data centers, cloud computing, at artificial intelligence infrastructure.
“Hindi lang ito usapin ng enerhiya. Para sa amin, may epekto ito sa mas malawak na digital ambitions ng bansa,” ayon kay Gustilo, na idiniin na mahalaga ang sapat at maaasahang suplay ng kuryente upang makahikayat ng malalaking foreign investors.
Tinaya ni Gustilo na kung ang mga proyektong ito ay naisakatuparan sa takdang panahon, maaari sanang masuportahan ang pagpasok ng hyperscale data centers at makalikha ng libu-libong trabaho, bagaman nilinaw niyang ito ay batay sa kanilang pagsusuri at hindi opisyal na projection ng pamahalaan.
Dagdag pa niya, may mga international technology firms umano na nagpasyang ilipat ang kanilang operasyon sa ibang bansa sa rehiyon kung saan mas mabilis na naipatupad ang mga kinakailangang power infrastructure.
“Sa karanasan ng mga investor, mas mahalaga ang aktwal na delivery ng kuryente kaysa sa plano o anunsiyo,” ayon kay Gustilo, na binigyang-diin na ang pagkaantala ng malalaking proyekto ay maaaring magdulot ng pag-aalinlangan sa mga mamumuhunan.
Samantala, kinumpirma ni Ombudsman Jesus Crispin Remulla na may isinasagawang imbestigasyon kaugnay ng ilang transaksyon na may kinalaman sa prangkisa ng Solar Philippines, kabilang ang umano’y pagbebenta o paglipat ng mga karapatan sa ilalim ng prangkisa nang walang kinakailangang pag-apruba ng Kongreso.
“Iniimbestigahan pa ito at wala pang pinal na konklusyon,” ani Remulla sa naunang panayam, na nilinaw na bahagi ito ng regular na proseso ng pagsusuri ng pamahalaan.
Noong 2023, naiulat na ibinenta ni Leandro Leviste, founder ng Solar Philippines at kinatawan ng unang distrito ng Batangas, ang 14.6 bilyong shares ng kumpanya sa Meralco PowerGen Corporation (MGen) sa halagang tinatayang P18.26 bilyon, isang transaksyong isinapubliko sa mga ulat sa negosyo.
Sa ngayon, wala pang pahayag ang Solar Philippines hinggil sa mga puna ng Digital Pinoys. Patuloy na mino-monitor ng mga stakeholder ang mga susunod na hakbang ng kumpanya at ang magiging resulta ng mga umiiral na imbestigasyon. RNT
