MANILA, Philippines – Mananatili ang Northeast Monsoon o Amihan sa bansa ngayong linggo, at inaasahang lalakas ito sa Luzon at Visayas pagsapit ng Miyerkules bago humina sa Huwebes at Biyernes.
Makararanas ng malamig na panahon ang Luzon, lalo na sa mga kabundukan, habang magiging mahangin naman sa ilang bahagi ng Visayas.
Inaasahan ang mahina hanggang paminsang katamtamang pag-ulan sa eastern Cordillera, Cagayan Valley, Aurora, Quezon, Oriental Mindoro, at paminsan-minsan sa Bicol Region.
Ang Shear Line ay patuloy na gagalaw sa gitna at timog ng Pilipinas depende sa lakas ng Amihan.
Dahil dito, magkakaroon ng katamtaman hanggang malalakas na ulan sa Bicol, hilagang MIMAROPA, at ilang bahagi ng Visayas lalo na sa Samar sa Lunes; at sa Visayas at ilang bahagi ng Mindanao sa Martes.
Posibleng mabuo ang isang low pressure area (LPA) sa silangan ng Palau at pumasok sa Philippine Area of Responsibility (PAR) sa Martes o Miyerkules. Mababa ang tsansa nitong maging bagyo.
Maaari itong tumawid sa Mindanao pagsapit ng Huwebes at humina sa Sulu Sea sa weekend, o kaya’y magtungo sa Caraga–Eastern Visayas at manatili roon hanggang magsanib sa Shear Line.
Kapag nagsanib ang LPA at Shear Line, inaasahan ang kalat hanggang malawakang katamtaman hanggang malalakas na ulan sa Mindanao, Visayas, at Bicol sa Huwebes at Biyernes.
Magdadala rin ng ulan ang Shear Line sa Southern Luzon sa Sabado at sa Bicol at Visayas sa Linggo. Inaasahan ang thunderstorms sa Visayas sa Sabado at sa Mindanao sa Linggo.
Sa Metro Manila, bahagyang maulap na may maaraw na bahagi sa umaga at hapon at mababa ang tsansa ng ulan mula Lunes hanggang Huwebes. Mula Biyernes hanggang Linggo, inaasahang magiging maulap na may pag-ulan. RNT/MND
