MANILA, Philippines – Naghain si Atty. Eldrige Marvin B. Aceron ng Petition for Full Disclosure ng draft committee report ng Senate Blue Ribbon Committee kaugnay ng imbestigasyon sa mga flood control projects, alinsunod umano sa karapatan ng publiko sa impormasyon sa ilalim ng Article III, Section 7 ng Saligang Batas.
Ayon sa petisyon, isinampa ito matapos maglabas ang ilang media outlet ng mga detalye mula sa isang umano’y na-leak na draft report noong gabi ng Pebrero 3, 2026. Batay sa mga ulat, ang naturang draft ay naglalaman ng mga rekomendasyong isaalang-alang ang pagsasampa ng mga kasong plunder at malversation of public funds laban sa ilang nakaupong at dating senador at iba pang opisyal ng pamahalaan. Wala pang inilalabas na pinal o opisyal na ulat ang komite sa ngayon.
Ang Senate Blue Ribbon Committee ay pinamumunuan ni Senador Panfilo Lacson.
Ngayong Pebrero 4, 2026, pormal na binawi nina Senador Juan Miguel Zubiri, Senador Joseph Victor Ejercito, at Senador Win Gatchalian ang kanilang mga lagda sa draft report. Dahil dito, hinihiling ng petisyon na obligahin ang tatlong senador na magsumite ng nakasulat na paliwanag ukol sa pagbawi ng kanilang mga lagda.
Naglalaman ang petisyon ng anim na kahilingan, kabilang ang paglalabas ng buo at walang tinanggal (unredacted) na draft ng committee report, gayundin ang pagpreserba ng lahat ng bersyon nito, kabilang ang orihinal na draft na pirmado bago ang nasabing mga pagbawi.
Hinihiling din sa petisyon na mabigyan ng certified true copy ang Senate Committee on Ethics and Privileges kaugnay ng mga nakabinbing reklamo laban kina Senador Francis “Chiz” Escudero at Senador Ejercito. Bahagi rin ng panawagan ang pag-inhibit ni Senador Ejercito sa anumang Ethics Committee proceedings na may kaugnayan kay Senador Escudero, upang maiwasan umano ang posibleng conflict of interest.
Aabot na sa 347 indibidwal ang lumagda bilang co-signatories ng petisyon, kabilang sina dating Constitutional Commissioner Ed Garcia at National Artist for Literature Virgilio S. Almario. Bukas din ang petisyon sa publiko sa pamamagitan ng email na [email protected] o sa numerong 0917 591 9782.
Noong Oktubre 2, 2025, naghain si Atty. Aceron ng isang beripikadong ethics complaint laban kay Senador Escudero. Ayon sa reklamo, tinatalakay nito ang isang campaign donation at isang kontrata ng pamahalaan na iniuugnay sa isang pribadong indibidwal at kompanya. Ang mga alegasyong ito ay nananatiling paksa ng isang pormal na proseso at wala pang pinal na desisyon.
Ayon pa sa petisyon, makalipas ang mahigit apat na buwan, wala pang naitalagang case number o opisyal na aksiyon ang Senate Committee on Ethics and Privileges sa naturang reklamo.
Noong Enero 22, 2026, naghain si Atty. Aceron ng hiwalay na reklamo laban kay Senador Ejercito, na tumutukoy sa umano’y kabiguang iproseso ang naunang ethics complaint. Ang usaping ito ay nananatiling nakabinbin at wala pang pinal na resolusyon. RNT
