via Philippine National Police Aviation Security Group
MANILA, Philippines – Umabot sa P30.27 milyon halaga ng hinihinalang ilegal na droga ang natuklasan sa 82 “abandoned” inbound parcels sa Central Mail Exchange Center (CMEC) sa Pasay City, ayon sa Philippine National Police Aviation Security Group (PNP AVSEG) nitong Biyernes.
Ayon sa pulisya, 42 parcels ang unang na-flag sa screening at sumailalim sa K9 paneling at manual inspection ng mga tauhan ng Customs, kung saan narekober ang 10,293 gramo ng hinihinalang marijuana kush na nagkakahalaga ng P15.44 milyon noong Martes.
“Records showed that the parcels originated from multiple [United States]-based shippers, with intended delivery addresses in Cavite and Laguna. All 42 parcels were declared abandoned at the time of interception,” ayon sa AVSEG.
Sa hiwalay na pahayag, sinabi ng pulisya na isa pang screening noong Miyerkules ang nagresulta sa pagkaka-flag ng karagdagang 40 parcels. Matapos ang K9 paneling at inspeksiyon ng Customs, nadiskubre ang 9,889 gramo ng hinihinalang marijuana kush na nagkakahalaga ng P14.83 milyon.
“Initial verification indicated that the parcels originated from various senders in the United States, with intended delivery addresses at multiple locations in the country. All parcels were considered abandoned at the time of seizure,” dagdag pa nito.
Ipinasa na sa Philippine Drug Enforcement Agency (PDEA) ang mga nasamsam na droga na ngayon ang nangunguna sa imbestigasyon. RNT/MND
