MANILA, Philippines – Nagpataw ang Land Transportation Office (LTO) ng 90-day preventive suspension sa lisensya ng driver ng isang sports utility vehicle na biglang huminto sa kalsada nang walang signal light.
Sa pahayag nitong Martes, Pebrero 10, tinukoy ng LTO ang viral video kung saan biglang huminto ang SUV sa kalsada nang hindi man lang gumagamit ng signal light dahilan para magdulot ng panganib sa ibang motorista.
Bukod sa suspensyon ng lisensya, nag-isyu ang LTO ng show-cause order laban sa driver kasama ang registered owner ng sasakyan.
Inatasan ang driver at registered owner na humarap sa LTO Intelligence and Investigation Division sa East Ave., Quezon City bukas, Pebrero 12.
Pinadadala rin dito ang mga dokumento ng sasakyan at notarized explanation kung “why they should not be charged for reckless driving and why the driver’s license should not be suspended or revoked.”
“This case underscores our commitment to enforcing traffic rules strictly and ensuring road safety for all Filipinos. No one is above the law—every violation puts lives at risk, and we will take decisive action to hold accountable those who disregard regulations,” pahayag ni LTO chief Markus Lacanilao.
Inilagay sa alarma ang sasakyan habang nagpapatuloy ang imbestigasyon. RNT/JGC
