MANILA, Philippines – Inanunsyo ng Maharlika Investment Corp. (MIC), kauna-unahan at natatanging sovereign wealth fund ng bansa, ang pagkakatalaga sa dalawang banking at finance veterans bilang Board of Directors nito.
Sa kalatas, sinabi ng MIC na sina Rolando Peñaflor at Enrico Cruz ay pinangalanang regular at independent directors.
Magsisilbi ng tatlong taong termino si Peñaflor bilang regular director na magdadala ng karanasan at kasanayan nito sa corporate banking, remedial management, real estate, at film production.
Si Peñaflor ay nagsilbing senior vice president for corporate banking sa Bank of the Philippine Islands (BPI).
Pinangunahan niya rin ang Jardiniano Development Corporation, Aspirea Development Corporation, at Oro de Siete Productions.
Samantala, si Cruz naman ay lumahok bilang independent director at mag-aambag ng apat na dekada ng karanasan matapos maglingkod bilang boards ng limang publicly listed at limang private companies sa finance, retail, real estate, at healthcare sectors.
Idinagdag pa ng MIC na si Atty. Roderick Sacro, executive vice president ng Land Bank of the Philippines, ay uupo sa role nito bilang alternate representative ng LandBank sa board ng sovereign wealth fund.
Si Sacro ay lumahok sa roster ng MIC board alternate representatives kabilang sina Undersecretary Ma. Angela Ignacio ng Department of Finance at executive vice president Carel Halog ng Development Bank of the Philippines (DBP).
Sinabi ni MIC President at CEO Rafael Consing Jr. na ang appointments ay magpapalakas sa pagsusulong ng institusyon na palakasin ang governance at investment discipline.
“Their depth of experience and independent perspective will be invaluable as we continue to build a disciplined, transparent, and globally credible sovereign investment institution,” ani Consing. RNT/JGC
