MANILA, Philippines – Inaprubahan ng House Committee on Appropriations ang isang panukalang batas na nagsusulong at magpapatatag sa Presidential Merit Scholarship Program na kabilang sa Legislative-Executive Development Advisory Council (LEDAC) agenda ni Pangulong Ferdinand “Bongbong” Marcos Jr.
Ang House Bill 5763 ay pinagsama-samang walong panukalang batas na inakda nina Leyte 1st District Rep. Ferdinand Martin G. Romualdez, TINGOG Party-list Reps. Yedda Marie K. Romualdez, Andrew Julian K. Romualdez, at Jude A. Acidre.
Ang panukala na nakatakdang mapasailalim sa Commission on Higher Education (CHED) ay nagsusulong sa isang komprehensibong scholarship package kabilang ang tuition fee at iba pang school fees, allowances at iba pang suporta sa mga kuwalipikadong mag-aaral maging pribado o pampublikong institusyon.
Sa pamamagitan ng programang ito ay nakatitiyak ang Kongreso na maisusulong ang academic excellence sa pamamagitan ng suporta ng gobyerno lalo na sa mga nagsipagtapos na may matataas na grado ngunit kapos sa pambayad ng matrikula at iba pang gugulin sa paaralan.
“Merit should never depend on income. When a student has shown discipline and excellence, the country must stand beside that student and allow that potential to grow for the benefit of the nation,” ani Acidre. Meliza Maluntag
