MANILA, Philippines – Nilinaw ng Taipei Economic and Cultural Office (TECO) sa Pilipinas na ang umano’y mastermind sa drum murder ng isang Chinese citizen sa Pasay City ay hindi Taiwanese kundi isang Chinese national na gumamit ng forged Taiwanese passport.
Ang suspek na kinilalang si alyas Davao, 32-anyos, ay inaresto noong Miyerkules sa isang hotel casino sa Parañaque City, apat na araw matapos matagpuan ang putol-putol na katawan ng biktima sa loob ng drum sa Binondo, Maynila.
“Upon learning that the arrested individual was described in certain reports as a Taiwanese national, TECO immediately initiated verification procedures. After carefully examining the passport presented by the suspect, this Office confirms that the document is a forged Taiwanese passport,” ayon sa TECO.
Sinabi ng TECO na nagsagawa ng consular verification ang kanilang opisyal at napag-alamang hindi makapagbigay ang suspek ng valid Taiwan national identification number at inamin na siya ay isang Chinese national. Inamin din umano ng suspek na binili niya ang pekeng passport sa pamamagitan ng Telegram online application.
“The government of Taiwan respects the judicial process of the Republic of the Philippines and will continue to cooperate with Philippine authorities in accordance with applicable laws and regulations, particularly in matters involving document fraud and transnational crime,” ayon sa TECO.
“We appreciate the professionalism and cooperation extended by Philippine law enforcement authorities in facilitating the verification process.”
Dagdag ng TECO, patuloy itong makikipagtulungan sa Philippine authorities habang nagpapatuloy ang imbestigasyon. Dave Baluyot
