MANILA, Philippines – Ipinahayag ng Department of Foreign Affairs (DFA) na gaganapin ang susunod na round ng negosasyon para sa South China Sea (SCS) Code of Conduct (COC) sa huling linggo ng Pebrero.
Ayon kay DFA maritime affairs spokesperson Rogelio Villanueva, makikipagpulong sa Singapore ang mga senior officials mula sa China at Association of Southeast Asian Nations (ASEAN).
Layunin ng mas madalas na pagpupulong na pabilisin ang negosasyon at ma-finalize ang COC bago matapos ang 2026, bilang bahagi ng mandato ng Pilipinas bilang ASEAN chair ngayong taon.
“As chair of the ASEAN, the Philippines has committed to pursue the momentum in the negotiations for the substantive and effective Code of Conduct,” sabi ni Villanueva.
Dagdag pa niya, “Actually, we are holding, in coordination with the other ASEAN member states and China, monthly face-to-face meetings to increase the opportunity to sit down and negotiate.”
Sa bilateral na usapin, patuloy ang pakikipag-ugnayan ng DFA sa China upang pamahalaan ang tensyon at resolbahin ang West Philippine Sea dispute sa mapayapa at diplomatikong paraan. Kasama rin sa talakayan ang schedule para sa susunod na Philippine-China Bilateral Consultation Mechanism (BCM) sa South China Sea.
Sinabi ni Villanueva na pinalalakas din ng gobyerno ang alyansa at pakikipag-partner upang mapanatili ang rules-based maritime order ayon sa international law. Kasalukuyang may 11 maritime dialogues ang Pilipinas upang mapalakas ang kapasidad nito.
“Even as the DFA deepens alliances and partnerships with like-minded countries, it also maintains open lines of communication with the Chinese side in pursuit of candid, constructive dialogue and practical cooperation,” ani Villanueva.
Malugod din niyang tinanggap ang kahandaan ng Senado na makipagpulong sa Chinese Embassy sa Manila bilang bahagi ng diplomatikong pagpapalitan. Ang dialogue ay nakikita ng DFA bilang “an opportunity for frank, cordial, and professional discussion — one that can candidly address divergent positions while also identifying areas of common understanding.”
Kung kakailanganin, handa ang DFA na magbigay ng kinakailangang suporta sa Senado para sa naturang pagpupulong. RNT/MND
