Mga taga-suporta ni FPRRD nanawagan sa SC, pauwiin na si Tatay Digong

MANILA, Philippines – Nanawagan ang ilang tagasuporta ni dating Pangulong Rodrigo Duterte sa Korte Suprema na maglabas na ng resolusyon hinggil sa mga nakabinbing petisyon ng dating pangulo.

Paliwanag ng grupo na Sara All Confideration, batid naman anila ang nangyayari ngayon sa bansa.

“Alam naman ng lahat ng Filipino ngayon all over the country and even outside the country right now that there is really a game of Justice that was done to the former President Rodrigo Duterte,” ayon pa kay Wendell Martin Cabrera, co-convenor ng grupo.

Ang dating pangulo umano ay iligal na kinidnap at isinuko sa dayuhang bansa na hindi isinumite sa local courts.

Giit nila na agad pabalikin sa bansa ang dating pangulo lalo na’t sa kanilang pananaw ay hindi tama ang ginawang pag-aresto sa kanila.

Kasabay nito, nagsumite ng “Tay, Kami Naman” signature campaign kung saan mahigit isang milyong pirma ang nakalap para kumbinsihin ang SC na magdesisyon na sa nakabinbing kaso kaugnay ng pag-aresto kay Duterte.

Naniniwala ang grupo ni Cabrera na ang desisyon ng Korte Suprema ang huling pag-asa ng mga taga suporta ng mga Duterte.

Ang hakbang ay kasunod ng nakatakdang pagsisimula ng confirmation of charges hearing laban sa dating pangulo sa International Criminal Court para sa kasong crimes against humanity. Jocelyn Tabangcura-Domenden