MANILA, Philippines – Nadakip ng mga operatiba na pinamumunuan ng Intelligence Section District Mobile Force Battalion ng Southern Police District (DMFB-SPD) ang isang babaeng wanted dahil sa kinahaharap nitong kasong paglabag sa RA 7610 sa Ninoy Aquino International Airport (NAIA) Terminal 1 noong Miyerkules ng tanghali, Pebrero 25.
Sa ulat na natanggap ni SPD Director P/Brig. Gen. Randy Arceo, kinilala ang inarestong suspek na si alyas Cecilia, 54, residente ng General Trias, Cavite.
Ayon kay Arceo, nadakip si alyas Cecilia bandang alas-12:20 ng tanghali sa NAIA Terminal 1, Barangay 194, Pasay City.
Sinabi ni Arceo na naisakatuparan ang pag-aresto sa bisa ng warrant of arrest na inilabas noong Nobyembre 7, 2025 ni Pasay City Regional Trial Court (RTC) Presiding Judge Christian Pascual Castañeda ng Branch 109.
Kaugnay ito ng kasong paglabag sa Section 10(a), Article VI ng Republic Act No. 7610 (Special Protection of Children Against Abuse, Exploitation and Discrimination Act) sa ilalim ng Criminal Case No. R-PSY-14-08005-CR. May inirekomendang piyansa ang korte na nagkakahalaga ng P80,000 para sa pansamantalang kalayaan ng suspek.
Pansamantalang nakapiit sa custodial facility ng Pasay City Police ang suspek habang hinihintay ang commitment order mula sa korte para sa paglilipat nito sa Pasay City Jail.
“The Southern Police District remains steadfast in its mandate to enforce the law and protect the public, especially in cases involving the welfare of children. This operation reflects our commitment to accountability, due process, and professional policing,” ani Arceo.
