MANILA, Philippines — Naglabas ang Department of Foreign Affairs (DFA) ng mga hotline at contact details na maaaring tawagan ng mga overseas Filipino workers (OFWs) at iba pang Pilipino sa Gitnang Silangan na apektado ng tumitinding tensyon sa pagitan ng Iran at Estados Unidos.
Ayon sa DFA, layunin ng mga inilabas na contact number na matiyak ang agarang pagtugon sa mga nangangailangan ng tulong, kabilang ang repatriation, welfare assistance, at iba pang serbisyong konsular, lalo na sa mga lugar na may banta sa seguridad.
Patuloy ding mino-monitor ng pamahalaan ang sitwasyon sa rehiyon habang hinihikayat ang mga Pilipino na manatiling kalmado, sumunod sa abiso ng lokal na awtoridad, at agad makipag-ugnayan sa embahada o konsulado sakaling mangailangan ng tulong.
Samantala, inanunsyo ni PLDT Chairman Manny V. Pangilinan na magbibigay ang PLDT at Smart ng libreng tawag para sa mga Pilipino sa Iran, Israel, Iraq, Bahrain, Kuwait, Oman, Qatar, UAE, at Saudi Arabia.
Sa pamamagitan ng TinBo app na gumagamit ng Smart Virtual Number, maaaring makatawag nang libre sa Pilipinas ang mga OFW sa mga nasabing bansa.
Bukod dito, maaaring tumawag nang walang bayad ang mga subscriber ng PLDT, Smart, at TNT sa Pilipinas sa kanilang mga mahal sa buhay sa Gitnang Silangan hanggang Marso 7, 2026, na maaari pang palawigin depende sa pangangailangan.
Available rin ang Smart crisis hotline (+63288457799) na bukas 24 oras at libre para sa mga nangangailangan ng agarang tulong.
Muling pinaalalahanan ng DMW at DFA ang mga OFW na panatilihing bukas ang komunikasyon sa kanilang employer at embahada, i-update ang kanilang contact details, at maging handa sakaling magpatupad ng evacuation o repatriation program.
Tiniyak naman ng pamahalaan na nakahanda ang mga ahensya nito upang tiyakin ang kaligtasan at kapakanan ng mga Pilipino sa gitna ng lumalalang sitwasyon sa rehiyon. Dave Baluyot
