MAYNILA — Inaresto ng National Bureau of Investigation–National Capital Region (NBI-NCR) sa isang entrapment operation sa Pasay City ang isang babaeng accountant ng isang construction company sa Ayala Alabang matapos umano nitong tangayin ang humigit-kumulang ₱5.3 milyon gamit ang tinatawag na “Double OTP” o “Double Payment” scheme.
Ayon kay NBI spokesperson Palmer Mallari, pinagkakatiwalaan ang suspek sa pagpoproseso ng bayad sa mahigit 50 supplier ng kumpanya. Napansin ng pamunuan ang dobleng bawas sa kanilang bank account kaya nagsagawa ng internal audit na naglantad sa umano’y modus.
Sa bawat online payment na nagkakahalaga ng ₱50,000 hanggang ₱100,000, kinakailangan ang one-time password (OTP) na ipinapadala sa cellphone ng project manager na naka-register sa bank account. Matapos maipasok ang unang OTP at maipadala ang bayad sa supplier, sasabihin umano ng suspek na “expired” o “invalid” ang OTP at hihiling ng panibago.
Sa ikalawang transaksyon, pangalan pa rin ng supplier ang nakalagay ngunit iba na ang account number na umano’y pag-aari ng suspek, kaya nagiging doble ang nababawas sa account ng kumpanya.
“May babayaran po kami 100,000 sa isang supplier. Ngayon po, yung 100,000 na yun, papasok na po sa supplier yun. Pero magre-request po siya ng tatlong OTP. Yung isang OTP dun, sasabihin niya expired na, which is yun po yung mapupunta sa account niya,” ayon sa project manager.
Lumabas sa audit na umabot sa 178 transaksyon ang isinagawa sa loob ng walong buwan.
Sa entrapment operation, inobserbahan ng mga awtoridad ang panibagong transaksyon kung saan muli umanong humingi ng dagdag na OTP ang suspek.
“In-anticipate nila there’s going to be a transaction to be processed by the suspect dahil na-realize nila na potentially magko-commit ng crime yung same employee on a particular transaction. Nakaabang na ang agents. True enough, ganon na nga nangyari, meron isang supplier na babayaran nagkaroon ng dual payments,” ani Mallari.
Mahaharap ang suspek sa kasong Qualified Theft sa ilalim ng Revised Penal Code kaugnay ng paglabag sa Cybercrime Prevention Act (RA 10175). Patuloy pa ang mas malalim na audit ng kumpanya dahil maaaring umabot sa ₱10 milyon ang kabuuang nawalang pondo. Dave Baluyot
