MANILA, Philippines – Pumanaw na si dating Health secretary at Ramon Magsaysay awardee Alfredo Rafael Antonio Bengzon, kinumpirma ng Department of Health (DOH) at Ateneo School of Medicine and Public Health.
Pumanaw si Bengzon sa edad na 90.
Sa Facebook post, sinabi ni Health Secretary Teodoro Herbosa na nagluluksa ang kagawaran sa pagpanaw ni Bengzon at kinilala ang mga kontribusyon nito sa public health.
“Rest in Peace Former Sec of Health Alfredo Rafael Antonio Bengzon,” ani Herbosa.
Si Bengzon ay nagsilbing kalihim ng DOH mula 1986 hanggang 1992 sa ilalim ni Pangulong Corazon Aquino at nagsulong ng mas accessible at murang healthcare para sa mga Filipino.
Kabilang sa mga kanyang mga kontribusyon ay ang Generic Drugs Law, na nag-oobliga sa paggamit ng generic name sa pagrereseta ng gamot.
Nakatulong ang polisiya para mapababa ang presyo ng mga gamot at mapataas ang market share ng generic medicine ng 64%.
Isinulong din niya ang mas malakaw na access sa family planning services, at pagpapakilala ng reproductive health initiatives sa kabila ng pagtutol ng religious groups.
Sa kanyang anim na taong panunungkulan, pinangunahan ni Bengzon ang reorganisasyon ng DOH na layong sugpuin ang corrupt practices at mapalakas ang public health education.
Noong 1991, nakatanggap siya ng Ramon Magsaysay Award for Government Service para sa kanyang liderato at reporma sa government services.
Si Bengzon din ay founding dean ng Ateneo School of Medicine and Public Health.
“The ASMPH community mourns the passing of our Founding Dean, Dr. Alfredo Rafael Antonio Bengzon. Through his vision and leadership, ASMPH was established and generations of physicians were formed in service of the Filipino people. His legacy will continue to guide our community,” saad sa pahayag ng paaralan.
Naging presidente rin siya at chief executive officer ng The Medical City. RNT/JGC
