MANILA, Philippines – Magsasagawa ng Women’s Month plenary session ang House of Representatives of the Philippines ngayong Lunes, Marso 9, kung saan mga babaeng mambabatas ang mangunguna sa sesyon at talakayan tungkol sa karapatan ng kababaihan, gender equality, at social development.
Pinamumunuan ang Kamara ni Speaker Faustino “Bojie” Dy III, habang sinabi ni Majority Leader Sandro Marcos na ang espesyal na sesyon ay pagkilala sa mahalagang papel ng kababaihan sa paggawa ng batas at pag-unlad ng bansa.
“This Women’s Month session reflects our recognition of the vital role women play in shaping laws, strengthening institutions and advancing our nation,” ani Rep. Marcos.
Magsisimula ang sesyon alas-3 ng hapon bilang bahagi ng taunang pagdiriwang ng papel ng kababaihan sa nation-building at public service.
Magsisilbing presiding officers sina Deputy Speaker Janette Garin at mga kinatawan na sina Ma. Georgina “Manay Gina” de Venecia, Linabelle Ruth Villarica, Maria Carmen Zamora, Maria Rachel Arenas, Ma. Victoria Co-Pilar, Rachel Marguerite del Mar, Gerville “Jinky Bitrics” Luistro, at Anna York Bondoc.
Kasama sa tutulong sa plenary team sina Alexandria “Queenie” Gonzales, Giselle Mary Maceda, Agatha Paula Aguilar Cruz, Josefina Tallado, at Kathryn Joyce Gorriceta.
Magbubukas ang programa sa call to order, pag-awit ng pambansang awit at invocation na pangungunahan ni Monique Yazmin Lagdameo.
Sa privilege hour, magbibigay ng mga talumpati ang mga kongresista tungkol sa iba’t ibang isyu ng kababaihan, kabilang ang:
–“Women, the Middle Class and the Cycle of Generational Scarcity” ni Lani Mercado-Revilla
–Karapatan ng mga katutubong kababaihan ni Dadah Kiram Ismula ng Akbayan Party-list
–Women’s empowerment sa pamamagitan ng financial independence ni Maria Cristina Angeles
–Human trafficking laban sa kababaihan at bata ni Audrey Kay Zubiri
–Care economy at child protection ni Richelle Singson ng Ako Ilocano Ako Party-list
–“Babaylan Rising: The Mother of All and the Soul of the Earth” ni Laarni Lavin Roque
–Teenage pregnancy ni Alyssa Michaela “Mica” Gonzales
–Kalagayan ng mga batang babae sa paaralan ni Renee Louise Co ng Kabataan Party-list
–Women’s economic empowerment ni Sarah Jane Elago ng Gabriela Party-list
–Women’s empowerment sa pamamagitan ng entrepreneurship ni Lolita Javier
–Patuloy na laban para sa gender equality ni Kaka Bag-ao
Tatalakayin din sa sesyon ang Committee Report No. 112 o House Bill No. 7704, na naglalayong palawakin ang mga ipinagbabawal na diskriminasyon laban sa kababaihan sa trabaho sa pamamagitan ng pag-amyenda sa Labor Code of the Philippines. RNT/MND
