MANILA, Philippines – Inanunsyo ng Metropolitan Manila Development Authority (MMDA) ang suspensyon ng expanded number coding scheme sa Biyernes, Marso 20, 2026, bilang paggunita sa Eid’l Fitr.
Ayon sa MMDA, awtomatikong suspendido ang number coding sa mga opisyal at special non-working holidays. Pinayuhan din ang mga motorista na planuhin ang kanilang biyahe dahil inaasahang dadami ang bibiyahe sa long weekend, at mahigpit na sumunod sa mga panuntunan sa kaligtasan sa kalsada.
Nauna nang idineklara ng Malacañang ang Marso 20 bilang regular holiday sa buong bansa upang markahan ang pagtatapos ng buwan ng Ramadan.
Samantala, inanunsyo ng Bangsamoro Darul Ifta na isasagawa ang official moon sighting para sa Eid’l Fitr sa Marso 19.
“This significant event will be led by the Bangsamoro Mufti, Sheikh Abdulrauf A. Guialani, who will make the formal pronouncement determining the conclusion of the holy month of Ramadhan,” ayon sa Bangsamoro Darul Ifta. Santi Celario
