MANILA, Philippines – Inilabas ng Professional Regulation Commission (PRC) ang listahan ng mga pumasa sa March 2026 Physicians Licensure Examination, ngunit hindi muna pinangalanan ang top scorer dahil sa beripikasyon o paghihintay ng desisyon kaugnay ng posibleng pananagutan.
Ayon sa PRC, 1,954 sa 2,781 na examinees ang pumasa sa pagsusulit na isinagawa ng Board of Medicine sa iba’t ibang testing centers kabilang ang Metro Manila, Baguio, Cagayan de Oro, Cebu, Davao, Iloilo, Legazpi, Lucena, Pampanga, Rosales, Tacloban, Tuguegarao, at Zamboanga.
“The results of examination with respect to five (5) examinees were withheld pending final determination of their liabilities under the rules and regulations governing licensure examinations; and one (1) was withheld for further verification,” ayon sa PRC.
Nakuha ni Alexis Bernardo Temblique ng Cagayan State University-Tuguegarao ang ikalawang pinakamataas na marka na 90.58%.
Para sa mga paaralan, ang Far Eastern University-Nicanor Reyes Medical Foundation ang nanguna sa may 100 o higit pang examinees, kung saan 165 sa 174 ang pumasa (94.83% passing rate).
Samantala, nanguna naman sa kategoryang may 50 hanggang 99 examinees ang Davao Medical School Foundation, na may 72 sa 82 na pumasa (87.80% passing rate). RNT/MND
