BAGUIO, Philippines – Nagkasundo ang mga residente at mga samahan ng public utility vehicle sa Baguio City sa isang “voluntary” na minimum fare na P20 at karagdagang P2 sa bawat susunod na kilometro matapos ang public consultation, bilang tugon sa tumataas na presyo ng krudo at sa hirap na dinaranas ng mga driver at commuter.
Sinabi ni Wilson Bumay-et, presidente ng United Jeepney Operator and Drivers Association in Baguio and Benguet, na isinagawa ng iba’t ibang asosasyon ang public consultation upang ipaliwanag sa publiko ang kanilang kahilingan para sa boluntaryong dagdag-pasahe.
Aniya, hindi na kinakaya ng transport sector ang gastos sa gasolina habang patuloy na nagseserbisyo sa mga pasahero.
“The different associations conducted public consultations to inform the public of their request for a voluntary fare increase. If they do not do it, the transport sector can no longer afford the cost of fuel to run their vehicle to service the public. We need everybody’s cooperation so that we both benefit,” pahayag ni Bumay-et.
Nilinaw ng transport groups na boluntaryo lamang ang pagbabayad ng P20 matapos magreklamo ang ilang pasahero nang may ilang operator na unang nag-anunsiyo na ito ay mandatory.
Ayon kay Bumay-et, matagal nang sinasalo ng mga driver ang dagdag-gastos sa gasolina para lamang maipagpatuloy ang biyahe, hanggang sa nauubos na maging ang kita nila para sa kanilang pamilya.
“As much as possible, we do not want to totally halt the operation, but the burden of the drivers subsidizing the fuel just to provide transportation has become too much to bear that they lose even the income for the day, which is supposed to be for their family,” dagdag niya. “We thank the passengers for their understanding of the situation. It is the only win-win solution we can think of to address the current situation of high fuel costs.”
Naabot ang kasunduang ito matapos aprubahan ng Land Transportation Franchising and Regulatory Board noong Marso ang P1 dagdag sa minimum fare ng traditional jeepneys, mula P13 hanggang P14, kasama ang P2 sa bawat susunod na kilometro, at P2 dagdag naman sa minimum fare ng modern jeepneys, mula P15 hanggang P17, kasama ang P2.30 sa bawat susunod na kilometro. Gayunman, iniutos ni Pangulong Ferdinand R. Marcos Jr. ang pagsuspinde sa fare hike na dapat sanang ipatutupad noong Marso 19 dahil sa dagdag na pasanin sa gitna ng sigalot sa Middle East.
Dahil walang naipatupad na pormal na fare adjustment, binawasan ng mga public utility jeepney ang kanilang biyahe at iniiwasang bumiyahe kapag kakaunti ang pasahero, na naging dahilan ng mahahabang pila sa loading areas sa city proper tuwing afternoon rush hour. Humihiling din ng boluntaryong P20 dagdag-pasahe ang mga taxi driver sa kanilang mga pasahero sa parehong dahilan.
May ilang commuter na nagsabing mahalaga ang naging konsultasyon dahil hindi lahat ng pasahero ay kayang pasanin ang malaking dagdag-pasahe. Sinabi ng regular commuter na si Dionisio Dennis na mas mabuti kung hindi ito mandatory para sa mga minimum wage earner, habang sinabi naman ng government employee na si Marie Cruz na katanggap-tanggap ang dagdag bilang tulong sa mga driver upang magpatuloy ang biyahe.
Samantala, nagbabala ang city government sa mga barangay official laban sa pangongolekta ng mga hindi awtorisadong bayarin o “donations” mula sa mga public utility jeepney association na gumagamit ng mga kalsada sa Central Business District bilang loading area.
Tinawag ni City Administrator Vittorio Jerico Cawis na iligal ang naturang gawain at nagbabala na maaaring maharap sa administrative charges at mga kaukulang parusa ang sinumang mapatutunayang sangkot dito. Mary Anne Sapico
