MANILA, Philippines – Nakakuha na ng freeze order ang Anti-Money Laundering Council (AMLC) para sa assets ng isang mambabatas na umano’y sangkot sa flood control corruption scandal.
Sa pahayag nitong Biyernes, Abril 24, sinabi ng AMLC na nag-isyu ang Court of Appeals (CA), na may petsang Abril 23, 2026, sa mga ari-arian ng isang “prominent incumbent legislator, a business associate, and a corporate entity that were found to have been involved in the flood control project anomalies.”
Hindi tinukoy kung sino ang mambabatas na ito, business associate, at corporate entity.
Sinabi ng AMLC na sakop ng freeze order ang 25 bank accounts at 10 insurance policies “registered under the name of the said legislator.”
Kabilang din sa frozen assets ang 27 bank accounts, 10 insurance policies, at isang investment account “under the name of the legislator’s alleged business associate” maging ang dalawang bank accounts, pitong property accounts, at isang real estate property na nakarehistro “under the name of the corporate entity.”
Nakakita umano ang CA ng sapat na dahilan para iugnay ang mga asset na ito sa plunder sa ilalim ng Republic Act No. 7659, sa Direct and Indirect Bribery sa ilalim ng Revised Penal Code, at paglabag sa Anti-Graft and Corrupt Practices Act o RA No. 3019.
“The filing of this Petition for Freeze Order underscores the AMLC’s continuous commitment to uphold public accountability and protect the integrity of the Philippine financial system,” ayon kay AMLC Executive Director Atty. Ronel Buenaventura.
Ang freeze order ay isang provisional remedy na nagpipreserba sa mga asset na may sapat na kaugnayan sa anumang aktibidad na labag sa batas bago ang paghahain ng forfeiture case.
Sa ngayon ay mayroon umanong 12 petisyon para sa civil forfeiture sa iba’t ibang Regional Trial Courts (RTC) laban sa mga ari-arian na iniuugnay sa mga anomalya ng flood control.
Ang mga ari-ariang ito ay kasalukuyang nakapreserba sa pamamagitan ng Provisional Asset Preservation Orders na inisyu ng RTCs, na nagbabawal sa kanilang paglipat, disposal o paggalaw habang pending pa ang civil forfeiture cases.
Nauna nang sinabi ng AMLC na ang kabuuang halaga ng frozen assets kaugnay sa imbestigasyon ng flood control scandal ay umabot na sa P24.7 bilyon, na binubuo ng mga bank account, insurance policies, motor vehicles, air assets, real properties, e-wallet accounts, securities accounts, at investment accounts. RNT/JGC
