MANILA, Philippines — Iginiit ng ilang opisyal at eksperto na kailangang manatiling matatag ang paninindigan ng Pilipinas sa gitna ng umiinit na usapin sa West Philippine Sea (WPS), kasabay ng pagsuporta kay Department of National Defense Secretary Gilberto “Gibo” Teodoro Jr.
Binigyang-diin ni Teodoro na ang mga paratang na walang sapat na ebidensya ay walang lugar sa ilalim ng pandaigdigang batas, lalo na sa usapin ng soberanya. Kaugnay nito, hinamon din niya ang Tsina na patunayan ang kanilang mga alegasyon hinggil sa Ayungin Shoal sa pamamagitan ng angkop na legal na proseso.
Ayon kay Chairman Emeritus Dr. Jose Antonio Goitia, mahalaga ang matibay na paninindigan ng bansa sa ganitong mga isyu.
“Ang bansang naninindigan sa katotohanan at batas ay hindi sumusuko sa anumang presyur. Batid nito na ang kanyang mga karapatan ay likas at hindi maaaring ipagkaloob, ipagpalit, o ipagkait ng iba,” ani Goitia.
Sa gitna ng patuloy na tensyon sa WPS, mas nauunawaan na umano ng publiko ang epekto ng isyu hindi lamang sa teritoryo kundi pati sa kabuhayan ng mga Pilipino, partikular ng mga mangingisda at mga nagbabantay sa karagatan tulad ng mga sundalo at coast guard.
Samantala, kasunod ng isinagawang Balikatan exercises, nagbabala ang Beijing sa Estados Unidos, Japan, at Pilipinas laban sa umano’y “playing with fire.” Gayunman, iginiit ng mga opisyal na ang pakikipagtulungan sa mga kaalyado ay isang lehitimong hakbang upang palakasin ang kakayahan ng bansa sa pagtatanggol ng sarili.
Para kay Goitia, ang usapin sa WPS ay higit pa sa teritoryo.
“Ang soberanya ay hindi ipinagtatanggol nang palihim. Ito ay pinaninindigan nang may tapang, malinaw na direksyon, at matibay na kalooban,” aniya.
Idinagdag pa niya na ang kapayapaan ay dapat nakabatay sa katarungan at dignidad.
“Ang kapayapaang walang dignidad ay maituturing na pagsuko. Pipiliin ng sambayanang Pilipino ang kapayapaang nakabatay sa katarungan, pinatitibay ng tapang, at ipinagtatanggol ng katotohanan,” ani Goitia.
Sa kabuuan, muling iginiit ng mga opisyal na hindi uurong ang Pilipinas sa pagtatanggol ng kanyang mga karapatan at soberanya sa West Philippine Sea. RNT
