Mas matibay na ugnayan para sa sustainable energy sa bansa, isinusulong ni Sen. Camille

MANILA, Philippines — Muling iginiit ni Senadora Camille Villar, ang pinakabatang senador ng ika-20 Kongreso at Chairperson ng Senate Committee on Environment, Natural Resources and Climate Change, ang kanyang pagsusulong ng mga solusyong nakatuon sa circular at renewable energy matapos niyang dumalo sa paglulunsad ng biomass facility ng Nestlé Philippines sa Cabuyao, Laguna—binigyang-diin ang mahalagang papel ng napapanatiling industriyal na praktis sa pagpapatibay ng energy resilience at pagsuporta sa mga lokal na komunidad.

“Sa panahong may pandaigdigang kawalan ng katiyakan at lumalalang hamon ng climate change, ang paraan ng ating paglikha ng enerhiya at pagpapanatili ng ating food systems ang magtatakda ng lakas at kinabukasan ng ating bansa,” ani Villar, habang binibigyang-diin ang agarang pangangailangan para sa mga solusyon sa napapanatiling enerhiya sa gitna ng hindi tiyak na suplay ng mga pinagkukunan ng enerhiya.

Pinuri ni Villar ang Nestlé Philippines sa pamumuhunan nito sa pasilidad na nagko-convert ng mga agricultural residues tungo sa malinis na enerhiya, at binanggit na ang ganitong mga inobasyon ay hindi lamang nakababawas sa pag-asa sa fossil fuels kundi lumilikha rin ng mga oportunidad sa kabuhayan para sa mga magsasaka sa pamamagitan ng pagbibigay-halaga sa mga dating itinuturing na basura. Iginiit niya na ang modelong ito ay sumasalamin sa inklusibo at lokal na pamamaraan ng sustainability na kinakailangan sa Pilipinas.

Binigyang-diin din ng senadora ang kahalagahan ng pagpapatibay ng mga polisiya hinggil sa resource efficiency at paggamit ng renewable energy, kasabay ng pangangailangang makabuo ng isang mas matatag at climate-resilient na ekonomiya sa harap ng tumataas na panganib sa pandaigdigang enerhiya at patuloy na hamon sa kapaligiran.

“Bilang mambabatas, tungkulin nating tiyakin na ang ganitong mga inisyatibo ay nabibigyan ng sapat na suporta, napapalawak, at napapanatili,” dagdag ni Villar, habang ipinahayag ang kanyang buong suporta sa mga inobasyong pinangungunahan ng pribadong sektor na umaayon sa pambansang layunin para sa sustainability. Inaasahan din niyang magsisilbing inspirasyon ang pasilidad upang mas marami pang pamumuhunan sa malinis na enerhiya at mas maraming industriya ang makiisa at maging bahagi ng solusyon.

Bahagi ang biomass facility ng mas malawak na layunin ng Nestlé Philippines na makamit ang net-zero emissions pagsapit ng 2050, kasabay ng ambag nito sa paglipat ng bansa tungo sa mas napapanatili at ligtas na hinaharap sa enerhiya. RNT