MANILA, Philippines – Sinabi ng Anti-Money Laundering Council (AMLC) na maaari pa ring ma-monitor ang mga manager’s checks (MC) kung gagamitin ito sa posibleng money laundering, sa gitna ng pangamba na maaaring abusuhin ito ng ilang opisyal.
Ayon sa AMLC, ang mga transaksyon na may kinalaman sa pagbili ng manager’s check ay maaaring i-report bilang covered o suspicious transactions, depende sa sitwasyon.
“[T]ransactions involving the purchase of an MC may be reported as covered or suspicious transactions, depending on the circumstances,” ayon sa AMLC, batay sa kanilang guidelines.
Giit ng ahensya, hindi anonymous ang manager’s check dahil naka-address ito sa partikular na payee at may bank records tulad ng pangalan ng bumili, halaga, petsa, at benepisyaryo, kaya may traceability ito.
“These features make the transaction traceable and capable of generating an audit trail,” dagdag ng AMLC.
Nilinaw din ng AMLC na sa ilalim ng Anti-Money Laundering Act, may mga pagkakataon na puwedeng i-override ang bank secrecy laws kung may legal na proseso at sapat na basehan ng imbestigasyon.
Ayon sa AMLC, obligado ang mga bangko na mag-report ng suspicious transactions, at may kapangyarihan din ang ahensya na imbestigahan ang mga account kung kinakailangan.
Samantala, sinabi ni Ombudsman Jesus Crispin Remulla na posibleng ginagamit ang manager’s checks bilang paraan ng money laundering, partikular sa mga kaso ng umano’y “unexplained cash” ng ilang kongresista na iniuugnay sa government contracts.
“Yung unexplained cash… titingnan namin… bibili sila ng MC sa bangko,” ani Remulla.
Dagdag niya, ginagamit umano ang bank secrecy at rules sa covered transactions bilang dahilan kung bakit nagiging mahirap ang pag-trace, ngunit iginiit ng AMLC na may umiiral na mekanismo para rito. RNT/MND
