MANILA, Philippines – Nahaharap sa reklamong graft ang undersecretary ng Department of Health na inihain sa Office of the Ombudsman nitong Huwebes, Abril 30 sa alegasyon ng conflict of interest dahil sa pagkakakuha umano ng kapatid nito ng mahigit P140 milyong halaga ng infrastructure projects, kabilang ang mga ospital, sa termino ng naturang opisyal.
Si Health Undersecretary Matthew Baggao ang target ng 13 pahinang reklamong inihain ng grupo na nagpakilalang mga “Concerned Health Workers” para himukin ang anti-graft body na imbestigahan ang opisyal at mag-isyu ng preventive suspension laban sa kanya.
“As Concerned Health Workers, we raise a red flag and call for action regarding the appointment of Undersecretary Glen Matthew Baggao as the head of the Health Facilities Enhancement Programs,” saad sa reklamo.
Anila, si Baggao, na itinalaga bilang Health undersecretary for the Public Health Services Cluster noong 2024, ay “guilty” sa Republic Act 3019 o Anti-Graft and Corrupt Practices Act “for manifest partiality and glaring conflict of interest.”
Inakusahan nila ang EGB Construction, isang kompanya na pagmamay-ari umano ng kapatid ng respondent na si Erni Baggao, na nakakuha ng limang infrastructure projects, tatlo rito ay ang mga ospital, na nagkakahalaga ng P140.99 milyon noong 2025.
Ayon sa reklamo, ang pinakamalaking proyekto na nakuha ng construction company ay ang Oriental Mindoro Central District Hospital na nagkakahalaga ng P63.1 milyon.
Sinabi pa sa reklamo na ang kompanya ay nakakuha rin ng apat na health infrastructures sa Isabela partikular ang Manuel A. Roxas District Hospital at Echague District Hospital na nagkakahalaga ng tig-P29.9 milyon; Divilacan Super Health Center na nagkakahalaga ng P11.9 milyon; at Moconacon Super Health Center na nagkakahalaga ng P5.9 milyon.
“Respondent, as Head of the HFEP Management Office, has the authority to approve the very health projects and budgets that are then bidded out and won by his brother’s company through the DPWH.”
Wala pang tugon si Baggao kaugnay nito.
Samantala, sinabi rin ng complainants na ang EGB Construction Corporation ay kabilang sa top 15 contractors na tinukoy ni Pangulong Ferdinand Marcos Jr. na nakakuha ng pinakamaraming flood control projects.
Nakatanggap umano ang kompanya ng 20 percent ng kabuuang P545 bilyong budget para sa flood mitigation projects. RNT/JGC
