MANILA, Philippines – Inaasahang ilalabas sa Hulyo ang desisyon sa mga petisyon na nananawagan ng P1,200 daily minimum wage sa mga manggagawa sa Metro Manila, ayon sa Department of Labor and Employment (Dole).
Sinabi ni Dole spokesperson and Assistant Secretary Lennard Serrano nitong Huwebes, Abril 30, na nakatanggap ang Regional Tripartite Wages and Productivity Board (RTWPB) para sa National Capital Region (NCR) ng 16 petisyon.
Ang pinakahuli ay ang inihain ng Business Process Outsourcing Industry Employees Network (BIEN) Philippines noong Miyerkules.
Inihihirit din sa mga petisyon sa NCR wage ang exemption mula sa 12-month “uninterrupted’’ wage cycle.
Ang wage cycle para sa 2025-2026 ay natapos na at inihahanda na ng regional wage boards ang 2026-2027 cycle.
“Let’s see how they (the NCR wage board) will treat the petition (as being) urgent and based on reasonable grounds.”
Ang huling wage increase na P50 sa Metro Manila ay ipinatupad noong Hulyo 18, 2025 na nagdala sa basic pay sa mga manggagawa sa nonagricultural sector mula P645 patungong P695.
“The NCR’s anniversary (since the last increase) is July 18; there may be a new wage order by then,” sinabi ni Serrano.
Kasalukuyan ding sinusuri ng iba pang regional wage boards sa buong bansa ang wage hike petitions.
Sa petisyon, tinukoy ng BIEN Philippines ang kombinasyon ng oil price hikes, kasalukuyang current national energy emergency, bumababang purchasing power ng piso, at tumataas na presyo ng basic goods bilang “a supervening event that justifies the immediate review and increase of workers’ wages.” RNT/JGC
