MANILA, Philippines – May mga lumulutang nang pangalan na magiging bahagi ng prosecution team sa oras na umabot sa trial stage sa Senado ang impeachment ni Vice President Sara Duterte.
Ayon kay House Justice Committee member Terry Ridon, posibleng ang prosecution team ay bubuoin ng mga bago at lumang pangalan.
Kabilang dito sina ML Partylist Representative Leila De Lima, Akbayan Representative Chel Diokno, at Ridon.
Posible rin aniyang makasama sina San Juan Representative Ysabel Zamora, Bukidnon Second District Representative Jonathan Keith Flores, Manila Third District Representative Joel Chua, at Cagayan de Oro First District Representative Lordan Suan.
Sa ilalim ng konstitusyon, 11 representative mula sa Mababang Kapulungan ang bubuo sa prosecution team sa oras na magsimula ang impeachment trial sa Senado.
“Nagbanggit si Congressman Gerville Luistro ng mga pangalan, itong nagdaan, sabi niya, may mga luma at may mga bago. Pero ang magpipinal diyan, hindi naman ang Committee on Justice kundi yung plenaryo po ng Kongreso mismo,” ani Ridon.
Noong nakaraang linggo ay nakitaan ng House Committee on Justice ng probable cause para ipadala ang impeachment complaints laban kay Duterte sa House plenary para pagbotohan.
Inaasahang aaprubahan ang Committee Report bukas, Abril 4, at ipadadala sa plenaryo.
Sinabi ni Bicol Saro Partylist Representative na posibleng maipadala ng Justice Committee ang articles of impeachment sa loob ng susunod na dalawang linggo.
“The House Committee on Justice has very high confidence na yung 106 votes na kailangan to impeach the Vice President will be met,” sinabi pa ni Ridon.
Naniniwala si Ridon na magkakaroon ng apat na Articles of Impeachment laban kay Duterte kabilang ang unexplained wealth, bribery, confidential funds misuse, at mga banta laban sa Pangulo.
“Hindi lang ho pating yung ating nakita sa pagdinig, balyena ang nakita doon sa P6.7 billion na pinag-uusapan natin na pumasok at lumabas sa transactions ng mag-asawang Duterte-Carpio,” anang mambabatas.
Wala pang pahayag ang defense team ni Duterte kaugnay nito. RNT/JGC
