BAGUIO, Philippines – Iaanunsyo ng Philippine Military Academy (PMA) ang pagho-host nito ng kauna-unahang International Conference of Cadets (ICC) sa Nobyembre bilang suporta sa chairship ng Pilipinas sa ASEAN Summit.
Ayon kay Lt. Commander Jesse Nestor Saludo noong Biyernes, layunin ng kumperensya na magsilbing plataporma para sa cultural exchange, professional development, at pagbabahagi ng best practices sa military education at leadership.
“This will serve as a platform for cultural exchange, professional development, and the sharing of best practices in military education and leadership,” aniya.
Dagdag niya, humigit-kumulang 19 bansa, kabilang ang mga miyembrong estado ng ASEAN, ang inaasahang lalahok sa naturang pagtitipon.
“This is a must especially that the Philippines is the host for ASEAN this year and other partner nations,” sabi pa ni Saludo.
Gaganapin ang ICC mula Nobyembre 17 hanggang 23, 2026 sa PMA, at inaasahang magtatampok ng mga tagapagsalita mula sa dating military strategists, corporate leaders, at mga akademiko.
“This conference, with the theme From Cadets to Catalysts: Transformational Leadership in a Globalized World, is the first of its kind in the Academy’s history,” dagdag niya.
Ayon naman kay PMA superintendent Vice Admiral Caesar Bernard Valencia, inaanyayahan din ang mga cadet mula sa mga kaalyadong bansa upang talakayin ang seguridad at modernong digmaan.
Sinabi rin niya na patuloy na pinapadala ang PMA cadets sa iba’t ibang military academies sa ibang bansa para sa training at exposure. RNT/MND
