ZAMBOANGA, Philippines – Nasunog ang isang cargo vessel na may dalang mahigit 100 fuel containers sa baybayin ng R.T. Lim Boulevard sa Zamboanga City noong Biyernes ng hapon, Mayo 8.
Kinilala ang barko bilang M/L Alkazer na pagmamay-ari ni Akmad Hamja. Paalis sana ito papuntang Tawi-Tawi nang sumiklab ang sunog bandang 5:30 p.m.
Ayon sa Bureau of Fire Protection (BFP), may kargang 135 gallons ng gasolina at dalawang drum ng diesel ang barko nang mangyari ang insidente.
Sinabi ni FO3 Rodel Araneta, lead investigator ng BFP, na posibleng mechanical failure habang pinapaandar ang makina ang sanhi ng sunog.
“Initial reports indicate the fire started around 5:30 p.m. while the vessel was bound for Tawi-Tawi. According to a witness, ignition occurred in the engine, causing it to burst into flames,” ani Araneta.
Mabilis na lumaki ang apoy dahil umano sa tumagas na fuel kaya napilitang tumalon sa dagat ang tatlong crew member upang makaligtas.
Nahihirapan ding lapitan agad ng mga bumbero ang barko dahil palayo ito sa baybayin habang nasusunog. Gumamit kalaunan ang responders ng aqueous film forming foam upang mapigil ang apoy nang mapalapit ang barko sa boulevard.
Ligtas namang nakaligtas ang tatlong crew member at wala ring pasahero sa barko. Gayunman, tuluyang nasira ang vessel at ang karga nitong fuel.
Patuloy pang iniimbestigahan ng mga awtoridad ang eksaktong sanhi ng fuel leak at kung sumunod ang barko sa mga safety regulation sa pagdadala ng mga madaling magliyab na materyales. RNT/MND
