MANILA, Philippines — Itinanggi ng Philippine Air Force (PAF) nitong Martes ang mga ulat na may naka-standby na civilian aircraft sa Villamor Air Base sa Pasay City para sa posibleng pagbiyahe kay Senador Ronald dela Rosa patungong The Hague, Netherlands.
Ayon kay PAF spokesperson Col. Ma. Christina Basco, wala umanong anumang opisyal na utos para sa ganitong operasyon at nananatiling nasa normal alert status ang kanilang hanay.
“The PAF has not received any official directive. Actually nga po ngayon, we are on white alert status. We are undergoing normal air operation. And, ayan po yung status po natin ngayon sa Villamor Air Base,” pahayag ni Basco sa briefing sa Camp Aguinaldo.
Nilinaw rin niya na walang anumang hindi pangkaraniwang aktibidad sa Villamor Air Base.
Samantala, sinabi ng Armed Forces of the Philippines (AFP) na iniiwan nila sa Philippine National Police (PNP) ang pagpapatupad ng peace and order, lalo na sa gitna ng mga protesta kaugnay sa kampo ni Dela Rosa at ng dating Pangulong Rodrigo Duterte.
“That is the primary mandate of the Philippine National Police. For the side of the Armed Forces of the Philippines, we continue to remain committed to our constitutional mandate of protecting the Filipino, and securing the state,” ani AFP spokesperson Col. Francel Margareth Padilla.
Dagdag pa niya, hindi nakikialam ang AFP sa partisan o political activities at iginagalang ang mga demokratikong proseso at institusyon.
Ang paglilinaw ay ginawa matapos kumpirmahin ng International Criminal Court (ICC) na ang kumakalat na arrest warrant laban kay Dela Rosa ay opisyal na dokumento ng korte. Ayon sa ICC, inisyu ito nang confidential noong Nobyembre 2025 at inilabas bilang public document noong Mayo 11, 2026. Dave Baluyot
