MANILA, Philippines – Sinuspinde ng Commission on Higher Education (CHED) ang implementasyon ng panukalang reframed General Education (GE) curriculum para sa lahat ng higher education programs ngayong school year matapos ang malawakang pagtutol mula sa iba’t ibang sektor ng edukasyon.
Inanunsyo ni CHED Chairperson Shirley Agrupis ang desisyon sa isang press briefing noong Miyerkules ng gabi, Mayo 13, matapos ang inter-agency meeting kasama ang Department of Education, Teacher Education Council, at Second Congressional Commission on Education (EDCOM 2).
“This is the reason why we called now for this interview so that we will put finality on the many, many doubts and questions from our stakeholders,” ani Agrupis.
“We came to a decision that there will be no GE implementation across all programs this school year. This is to give us time to analyze and study well the different manifestations, because we understand where they are coming from,” dagdag niya.
Nilinaw din niya na wala ring pilot testing sa teacher education programs, at inilipat sa taong 2028 ang target na implementasyon upang magkaroon pa ng mas malawak na pag-aaral at konsultasyon.
Ang panukala, na naglalayong bawasan ang GE units mula 36 tungo sa 18, ay umani ng kritisismo mula sa academic groups, faculty unions, at advocacy groups na nangangambang maaaring humina ang humanities at social sciences education.
Ayon kay Agrupis, layunin ng reporma na alisin ang overlapping subjects sa senior high school at kolehiyo at iangkop ang kurikulum sa pangangailangan ng makabagong workforce.
“The main goal of this proposed reframing is to review and eliminate the redundancies between the senior high school and college GE courses,” aniya.
Sinabi rin ng CHED na bubuo ito ng inter-agency technical working group upang masuri pa ang panukala at pagsamahin ang mga rekomendasyon mula sa iba’t ibang sektor. Nakatanggap na rin ang ahensya ng mga position paper at opisyal na pahayag mula sa mga institusyon at stakeholder.
Aminado rin si Agrupis sa mga alalahanin hinggil sa posibleng pagkawala ng trabaho ng ilang faculty members, ngunit sinabi niyang matagal na itong mino-monitor ng CHED sa pamamagitan ng data collection at feedback mechanisms.
