WASHINTON, USA – Ikinumpirma ng may-ari ng experimental solar-powered aircraft na Solar Impulse 2 na bumagsak ito kamakailan sa Gulf of Mexico matapos ang isang test flight.
Ang Solar Impulse 2 ay kilala sa makasaysayang pag-ikot sa mundo noong 2016 nang lumipad ito nang 26,700 miles (43,000 kilometers) sa loob ng 17 stages at walang ginamit na jet fuel.
Pinalipad noon ng Swiss pilots na sina Bertrand Piccard at André Borschberg, naging kauna-unahang aircraft ito na nakapaglibot sa mundo gamit lamang ang solar power.
Ayon sa Skydweller Aero, na bumili ng aircraft tatlong taon matapos ang world tour at ginawang drone, umalis ang Solar Impulse 2 mula Stennis, Mississippi noong Abril 26 at bumagsak sa Gulf of Mexico noong Mayo 4.
“Ultimately, a record-breaking flight of 8 days and 14 minutes validates the reality of perpetual, solar-powered flight in a military mission-relevant environment,” ayon sa kumpanya.
Ginamit umano ang aircraft sa isang US Navy exercise bago ang insidente.
Patuloy namang iniimbestigahan ng US National Transportation Safety Board (NTSB) ang sanhi ng pagbagsak ng solar-powered aircraft. RNT/MND
