MANILA, Philippines – Maaaring makaranas ang Pilipinas ng mas matitinding pagbabago sa panahon habang inaasahang magsasabay ang southwest monsoon o Habagat at posibleng Super El Niño mula Hunyo hanggang Agosto ngayong taon, ayon sa state weather bureau PAGASA.
Ayon sa PAGASA, may 92 porsyentong posibilidad na magkasabay ang Habagat at isang “very strong” o “Super” El Niño, na tumutukoy sa abnormal na pag-init ng temperatura ng tubig sa Pacific Ocean.
Sinabi ni PAGASA Climate Monitoring and Prediction Section chief Ana Liza Solis na maaaring magdulot ito ng mas malalakas na pag-ulan sa kabila ng El Niño dahil sa pinalakas na southwest monsoon at posibleng pag-impluwensya ng mga bagyo.
Ipinaliwanag niya na sa panahon ng El Niño, humihina ang easterlies at maaaring manaig ang westerlies, at may mga pagkakataong nagre-recurve ang mga bagyo na nagpapalakas pa ng Habagat, kaya tumataas ang panganib ng pagbaha.
Batay sa kasaysayan, kahit mas kaunti ang bagyong pumapasok sa bansa tuwing El Niño, ang mga tumatama ay kadalasang mas malalakas at nagdudulot ng matinding ulan o malalakas na hangin.
Ayon pa kay Solis, ang “very strong” El Niño ay may kaugnayan sa pagtaas ng temperatura ng dagat na higit 3°C hanggang 3.5°C, na maaaring magdulot ng matinding epekto sa klima. Huling naobserbahan ang ganitong kondisyon noong dekada 1870.
Sa mga nakaraang El Niño events noong 2015, 2018–2019, at 2023–2024, nakaranas ang bansa ng ilang bagyo tulad ng “Usman” na nagdulot ng maraming pagkamatay, pati na iba pang bagyong pumasok sa Philippine Area of Responsibility.
Nagbabala ang PAGASA na maaaring magkaroon ng matitinding pag-ulan na biglaan o tuloy-tuloy, kaya mahalaga ang paghahanda dahil sa limitasyon ng mga lumang flood control systems sa maraming urban na lugar.
Ayon pa sa ahensya, pagkatapos ng Habagat season ay maaaring sumunod ang matagal na tagtuyot, na inaasahang rurok ng El Niño sa Oktubre hanggang Disyembre, na posibleng makaapekto sa agrikultura at produksyon ng pagkain.
Nanawagan ang PAGASA sa pambansa at lokal na pamahalaan na palakasin ang paghahanda at mitigation measures dahil sa posibleng pag-ikot ng bansa sa pagitan ng pagbaha at tagtuyot. Santi Celario
