MANILA, Philippines – Inanunsyo ng Land Transportation Franchising and Regulatory Board (LTFRB), sa ilalim ng patnubay ni DOTr Secretary Giovanni “Banoy” Z. Lopez, ang pagtatapos ng pagpapatupad ng Land-Based Service Contracting Program (LBSP).
Magtatapos ang programa sa Mayo 22, (Biyernes), ang huling araw ng trabaho para sa karamihan ng mga manggagawa ngayong linggo, ayon kay LTFRB Chairman Atty. Vigor D. Mendoza II.
Kaugnay nito, nagbibigay ang LBSP ng 20% na diskwento sa pamasahe para sa lahat ng regular na pasahero at kabuuang 40% na diskwento para sa mga estudyante, nakatatanda, at mga taong may kapansanan. Layunin ng programa na tulungan ang mga commuter sa mabilis at abot-kayang mass transport system.
Sa kabila ng pag-unlad na ito, binigyang-diin ni Chairman Vigor ang patuloy na suporta ng pambansang pamahalaan, alinsunod sa utos ni Pangulong Ferdinand “Bongbong” R. Marcos, Jr. na alagaan ang kapakanan ng mga nasa sektor ng transportasyon.
Isang kabuuang 141,724 na yunit ng passenger jeepneys at UV Express ang na-upload na sa fuel discount subsidy program, na nangangahulugang ang mga yunit na ito ay maaaring nang makinabang sa diskwento para sa diesel.
Samantala batay sa aprubadong alituntunin, ang mga kalahok na gasolinahan ay ikokonekta sa database ng pambansang gobyerno sa pamamagitan ng isang mobile app na maglilista ng mga kwalipikadong benepisyaryo ng programa.
Tanging ang mga PUV na may umiiral at balidong prangkisa lamang ang isasama sa database para sa 150-liters na hangganan bawat linggo para sa bawat yunit ng PUV.
Sinabi ni Chairman Vigor na iniutos na niya sa lahat ng LTFRB Regional Directors na magsagawa ng information drive upang ipaalam sa mga jeepney at UV Express driver tungkol sa 4,299 na kalahok na gasolinahan sa kani-kanilang mga lugar. Santi Celario
